Арассыыйа Төрүт Сокуонугар уларытыылар дьиэ кэргэн уонна кэргэннии буолуу үнүстүүтүн бөҕөргөтүүгэ туһуланаллар диэн СӨ Уопсастыбаннай палаататын социальнай бэлиитикэҕэ хамыыһыйатын бэрэссэдээтэлэ Лена Ефремова санаатын этэр.
– Оҕолор Арассыыйа судаарыстыбаннай бэлиитикэтигэр инники күөҥҥэ биллэриллэллэр. Судаарыстыба оҕолору духуобунай, сиэр-майгы, өй-билии, эт-хаан өттүнэн сайыннарарга бары усулуобуйаны тэрийиэхтээх, дойдуга бэриниилээх буоларга, аҕа дьону ытыгылыырга иитиэхтээх. Ийэ, аҕа буолуу, дьиэ кэргэн, кэргэннии буолуу үнүстүүтүн көмүскэллээх буолуулара сокуоҥҥа суруллар.
Арассыыйа Бэрэсидьиэнэ Владимир Путин Конституцияҕа уларытыыларга: «Оҕо – бүттүүн норуот баайа, оҕоҕо харыстабыллаахтык сыһыаннаһыахтаахпыт. Инники Төрүт сокуоҥҥа оҕолор тустарынан быһаччы этиллибэтэҕэ, билиҥҥи демографическэй кыһалҕалары учуоттаан, бу сөптөөх дии саныыбын. Биһиэхэ Арассыыйа норуоттарын үгэстэригэр оҕолорго куруук харыстабыллаах сыһыан баара».
Биһиги дьиэ кэргэн уонна кэргэннии буолуу үнүстүүтүн, сиэр-майгы сыаннастарын, дойдуга бэриниилээх буолууну бөҕөргөтүү, оҕо саас саамай сыаналаах баайбыт буоларын билинии идиэйэлэрин өйүүбүт.
ulus.media саайтан.