Лена Бочкарева: “Кэлэр кыстыкка 230 ынаҕы киллэриэхпит”

Ааптар: 
Бөлөххө киир:

Эбээн Бытантай национальнай улууһун киинигэр, Баатаҕай Алыытыгар, саха сүөһүтүн иитиигэ идэтийэр «Бытантай» генофонднай питомникка 120 ынах турар толору хааччыллыылаах комплекса үлэҕэ киллэриллибитэ.

edersaas.ru

Ааспыт сылларга питомник сүөһүтэ Кустуурга турбута. Хотон эргэ, үлэһит илии тиийбэт, от үлэтэ кыайтарбат буолан, хаһаайыстыба мөлтөх балаһыанньаҕа киирбитэ. Аһыгар-үөлүгэр талымастаабат, тулуйумтуо, ыарыыга, томороон тымныыга бэриммэт саха төрүт сүөһүтүн ууһатан иитиигэ болҕомто уурарга нэһилиэнньэ улахан мунньахтарга, бырабыыталыстыба отчуоттарыгар үгүстүк туруорсара. Ол түмүгэр, бу саҥа комплекс баар буолла, салалта уларытылынна.

Лена Бочкарева, «Бытантай» генофонднай питомник салайааччыта:

— Барыта 250 сүөһүлээхпит, Алын Бытантайтан 26 ынаҕы аҕаллыбыт. Кыһын, суол туруута, өссө уончаны аҕалыахпыт. Билиҥҥитэ 44 ньирэйдэннибит. Кэлэр кыстыкка 230 ынаҕы киллэрэр былааннаахпыт: Баатаҕай Алыытыгар 110, Кустуурга 120. Оттооһун хампаанньата хайдах барарыттан эмиэ тутулуктанабыт. Кыһыны этэҥҥэ туоруурга 350-400 туонна от оттонуохтаах. Окко нэһилиэктэр дьаһалталара, тэрилтэлэрэ төһүү күүс буолуохтара диэн бигэ эрэллээхпит, хас да сыл үчүгэйдик көмөлөһөн кэллилэр. Баһылыктар анаан, эбии үп көрөн, дьону көҕүлүүллэрэ хайҕаллаах. Каадыр өттүнэн хааччыллыылаахпыт, штат быһыытынан 23 миэстэлээхпитигэр үлэһиппит толору.

Саҥа салайааччы Лена Дмитриевна тыа хаһаайыстыбатыгар уопуттаах исписэлиис. Сүөһү иитиитэ – кини кыра эрдэҕиттэн этинэнхаанынан билэр үлэтэ. Онон туох баар билиитинкөрүүтүн, үөрүйэҕин туһанан бу хаарыаннаах сүөһүбүтүн көрүүнү өрүттэр суолга таһаарар, сайыннарар, элбэтэр-ууһатар сыаллаах үлэнихамнаһы ыытарыгар улуус дьоно-сэргэтэ эрэнэбит.

Эбээн Бытантайтан Яна РОЖИНА “Саха сирэ” edersaas.ru сайтка анаан.

+1
0
+1
0
+1
0
+1
0
+1
0
+1
0
+1
0