Лена Афанасьева успуорт комплексыгар тэриллибит амбулаторнай киин үлэтэ тоҕо тохтуу сылдьыбытын быһаарда

Коронавирус тарҕаныытын утары тэриллибит Суһал ыстаап ыытар брифинигэр Доруобуйа харыстабылын миниистирэ Лена Афанасьева «Триумф» успуорт комплексыгар амбулаторнай киин үлэтэ быстах кэмҥэ тоҕо тохтуу сылдьыбытын туһунан маннык быһаарыыны биэрдэ:

—-Тохсунньу 27 күнүгэр аһыллыбыт кииҥҥэ, киэһээ 18:00 чаастааҕы туругунан барыта 2 300 киһи көрдөрбүт. Итинтэн 40% доруобай эрээри, бэйэлэрин билиҥҥи туруктарын билэ кэлбиттэр. Ол иһин олус элбэх киһи тоҕуоруспут. Ол иһин, санитарнай-эпидемиологическай нуормалары тутуһар сыалтан, быраастар хааччахтааһын миэрэлэрин киллэрбиттэр. 

Миниистир амбулаторнай кииҥҥэ сөтөллүбүт, 38°С кыраадыстан намыһах температуралаах дьону көрөллөрүн туһунан бэлиэтээн эттэ. 38°С кыраадыстан үөһээ температуралаах, тыыналлара ыарахан, аҕылыыр дьон дьиэҕэ сытан “суһал көмө” биригээдэтин ыҥырыахтаахтар.

—Туруктара үчүгэй дьон бу амбулаторнай кииҥҥэ кэлэллэрэ наадата суох. Манна тымныйыылаахтары коронавирустаабыт дьонтон араарыы үлэтэ ыытыллар. Киин үлэтэ салгыы бара турар, тохтобул буола сылдьыбытын бырастыы гынаргытыгар көрдөһөбүн, —  диэтэ Лена Афанасьева.

Санатан эттэххэ, «Триумф» спорт дьиэтигэр амбулаторнай киин күн аайы 8:00 чаастан 20:00 диэри үлэлиир. Ону таһынан Дьокуускайга хас поликлиника аайы 8:00 чаастан 20:00 диэри үлэлиир кабинеттар бааллар.

«Саха сирэ» хаһыат, edersaas.ru

Хаартыска sakha.gov.ru