Лена Афанасьева: «Уһун өрөбүллэргэ олоххо тыын наадалаах эрэ тэрилтэлэр үлэлиэхтэрэ»
Бүгүн, алтынньы 26 күнүгэр, коронавируһу утары тэриллибит Суһал ыстаап брифинин СӨ Доруобуйа харыстабылын миниистирин эбээһинэһин толорор Лена Николаевна Афанасьева ыытта.
Лена Николаевна ааспыт сууккаҕа өрөспүүбүлүкэ үрдүнэн 277 киһи ыалдьыбытын туһунан иһитиннэрдэ, уопсай туругу өссө даҕаны тыҥааһыннаах диэн эттэ. Салгыы миниистир эбээһинэһин толорооччу Ил Дархан ыйааҕынан, алтынньы 30 күнүттэн сэтинньи 7 күнүгэр диэри киллэриллибит хааччахтар сүрүн балаһыанньаларын кытта билиһиннэрдэ.
Ол курдук, сэтинньи 7 күнүгэр диэри олоххо тыын наадалаах эрэ тэрилтэлэр үлэлиэхтэрэ (мэдиссиинэ тэрилтэлэрэ, бырамыысыланнас тэрилтэлэрэ, аптекалар, бородуукта маҥаһыыннара).
Үгүс тэрилтэлэр үлэлэрэ тохтотуллар, оттон үлэлииллэрэ көҥүллэнэр тэрилтэлэргэ быһыыны ылбытын мэктиэлиир QR-куодунан эрэ киириэххэ сөп буолар. Доруобуйаларынан быһыыны сатаан ылбат дьон туоһулуур докумуоннаах буолаллара ирдэнэр, итиэннэ 72 чаастан бэттэх туттарбыт ПЦР анаалыс «отрицательнай» түмүгүн.
Култуура тэрилтэлэрэ QR-куодунан көрөөччүлэри киллэрэллэр, саала 50% толору буолуохтаах. Саастарын ситэ илик оҕолор QR-куодтаах төрөппүттэрин кытта сылдьыахтаахтар.
«Саха сирэ» хаһыат, edersaas.ru
Хаартыска sakha.gov.ru