Лена Афанасьева: «Мэдиссиинискэй кислородунан толору хааччыллыылаахпыт»

СӨ доруобуйа харыстабылын миниистирэ Лена Афанасьева иһитиннэрбитинэн, билигин өрөспүүбүлүкэ эмтиир  тэрилтэлэрэ мэдиссиинискэй кислородунан толору хааччыллыылаахтар.

Коронавирус бу долгунугар мэдиссиинискэй кислородка наадыйыы биллэ аҕыйаата.
«Пандемия кэмигэр өрөспүүбүлүкэ мэдиссиинискэй тэрилтэлэригэр 16 кислородтаах ыстаансыйа, 228 орон таһынааҕы концентратор уонна 195 ИВЛ-аппарат атыылаһыллыбыта», -– диэн эттэ.

Билигин икки кислородтаах ыстаансыйа Мииринэй оройуоннааҕы балыыһатыгар тиэрдилиннэ. Бу балыыһаҕа тиэрдиллиэхтээх өссө икки контейнер Новосибирскай уобалас диэкинэн айаннаан иһэр. Өссө Дьокуускай куоракка Мэдиссиинэ национальнай киинигэр, Өрөспүүбүлүкэтээҕи 2 №-дээх балыыһаҕа уонна 3 №-дээх өрөспүүбүлүкэтээҕи килиниичэскэй балыыһаҕа бэриллиэхтээх кислородтаах ыстаансыйалар собуоттан аҕалыллан эрэллэр.
«Хантараак усулуобуйатын быһыытынан, тиэрдээччи төлөбүр харчытын судаарыстыбаннай хантараагы толорон бүттэҕинэ эрэ ылар», -– диэн Лена Афанасьева быһаарда.

Надежда ЕГОРОВА, «Саха сирэ», edersaas.ru