Саха Өрөспүүбүлүкэтин доруобуйа харыстабылын миниистирэ Лена Афанасьева Саха сирин дьонун уонна биир идэлээхтэрин Саҥа дьылынан эҕэрдэтигэр доруобуйа харыстабылын сүрүн түгэннэригэр тохтоото.
— Ааспыт сыл эмчиттэргэ эрэ буолбакка, биһиги дойдубут олохтоохторугар ыарахан сылынан буолла. Ол гынан баран, пандемияны уонна ону кытта сибээстээх хааччахтааһыннар баалларын да иһин, өрөспүүбүлүкэ доруобуйатын харыстабыла туруоруммут соруктарын уонна сайдыы судаарыстыбаннай бырагыраамаларын салҕыы олоххо киллэрдэ.
Ол курдук, үһүс сылын үлэлиир «Доруобуйа харыстабыла» уонна «Демография» национальнай бырайыактар биһиги салаабыт хаачыстыбалаах трансформациятын хааччыйан, мэдиссиинискэй көмө хаачыстыбатын биллэ тупсардылар. Өрөспүүбүлүкэ бэрэсидьиэнэ Айсен Николаев өрөспүүбүлүкэҕэ биллэрбит Доруобуйа сылыгар доруобуйа харыстабылын бастакы звенотун саҥардарга, доруобуйаны харыстааһын тускулларын киллэрэргэ уонна олох нус-хас усулуобуйатын оҥорорго хайысхаламмыт дьаһаллар ыытылыннылар. Бу үлэлэр түмүктэрин Саха сирин олохтоохторо, арааһа, номнуо билбиттэрэ буолуо. Өрөспүүбүлүкэ 21 оройуонугар саҥа биэлсэр-акушер пууна уонна быраас амбулаторията аан бастаан аһылынна. Онкология амбулаторнай көмөтүн кииннэрэ уонна бастакы сүһүөх тымыр отделениелаар аһыллаллар. Көһө сылдьар мобильнай комплекстар уонна «суһал көмө» массыыналара атыылаһылыннылар.
Өр сылларга аан бастаан 5 оройуоннааҕы киин балыыһа тутуутун тута саҕалаатыбыт. Ону сэргэ Кардиология уонна Онкология кииннэрин тутуу түмүктэнэн эрэр. Онтон уруккуттан үлэлиир мэдиссиинискэй тэрилтэлэр аныгы мэдиссиинискэй тэриллэри ылаллар, мэдиссиинискэй өҥөлөрү сыыппараҕа киллэрии салҕанар. Каадыр тиийбэт боппуруоһун быһаарарга элбэх үлэ ыытыллар. 2024 сылга диэри мэдиссиинэ бастакы сүһүөх звенота уонна кардиология, онкология, педиатрия сулууспалара каадырынан хааччыллалларыгар эрэнэбит. Бу -– СӨ Ил Дарханын уонна бырабыыталыстыбатын өйөбүлүнэн эрэгийиэн доруобуйатын харыстабылыгар саҕаламмыт киэҥ хабааннаах үлэ сорҕото эрэ.
Надежда ЕГОРОВА, «Саха сирэ», edersaas.ru