Ааспыт нэдиэлэҕэ СӨ Доруобуйатын харыстабылын миниистирин эбээһинэһин толорооччунан анаммыт Лена Афанасьева бүгүҥҥү бастакы брифинин кэмигэр иһитиннэрбитинэн, Саха сиригэр коронавируһунан ыалдьар 200 киһи ыарахан туруктааҕын, мэдэссиинэ тэрилтэлэрэ улахан ноҕоруускалаахтык үлэлииллэрин эттэ.
Бүтэһик сууккаҕа өрөспүүбүлүкэҕэ 275 киһи коронавирустаабыт. “Ордук тыҥааһыннаах улуустарынан Бүлүү, Үөһээ Бүлүү, Мэҥэ Хаҥалас, Нам, Уус Алдан, Хаҥалас, Дьокуускай куорат буолаллар. Мэдиссиинэ тэрилтэлэрэ олус улахан ноҕуруускалаах үлэлииллэр. Ыарахан туруктаах 200 киһи баар, ИВЛ-аппараакка 41 киһи холбонон сытар. Ыалдьыбыт дьон уопсай ахсааныттан 21 бырыһыана — оҕолор”, — диэн миниистир эбээһинэһин толорооччу эттэ.
Билиҥҥитэ 377 645 киһи быһыы бастакы компоненын ылбыт, ити улахан дьон 52,7 бырыһыана буоларын ыйда. Ревакцинацияны 22 122 киһи ааспыт.
Күн бүгүн вакцина бары улуустарга, мэдиссиинэ тэрилтэлэригэр баарын ыйар итиэннэ коронавируһунан ыараханнык ыалдьыыттан соҕотох көмүскүүр көрүҥүнэн быһыыны ылыы буоларын тоһоҕолоон бэлиэтээтэ.
Людмила ПОПОВА, “Саха сирэ” хаһыат, edersaas.ru