Коронавирус сыстыганнаах дьаҥа өрө турубут кэмигэр, үлэлииллэрэ көҥүллэммит эргиэн тэрилтэлэригэр ураты болҕомто ууруллуохтааҕын туһунан Ил Дархан Айсен Николаев улуустар баһылыктарын кытта буолбут селекторнай мунньахха анаан бэлиэтээтэ.
edersaas.ru
Аҕа баһылык кэлиҥҥи кэмнэргэ дьонтон сорох аптекалар уонна маҕаһыыннар атыылааччылара мааската, бэрчээккэтэ суох үлэлииллэрин туһунан үҥсүүлэр киирэллэр диэн эттэ.
— Маны таһынан, таһырдьа сылыйан, күүлэйдиир дьон ахсаана үксээтэ. Мааскалаах сылдьыы ирдэбилин эмиэ тутуспаттар. Маннык балаһыанньа сал5анар буолла5ына, ыам ыйын 12 күнүттэн дьиэҕэ олоруу эрэсиимиттэн сыыйа тахсарбыт саарбах, — диэтэ Ил Дархан.
Маны тэҥэ, Айсен Николаев СӨ Бырабыыталыстыбатыгар, Ил Дархан уонна Бырабыыталыстыба Дьаһалтатыгар эрэгийиэҥҥэ хааччахтааһын миэрэлэрин сыыйа устар туһунан былааны бэлэмнииллэригэр сорудахтаабытын иһитиннэрдэ. Онон сибээстээн, улуустар баһылыктарыгар бэйэлэрин этиилэрин өрөспүүбүлүкэтээҕи суһал ыстаапка тиэрдэллэригэр сорудахтанна.
Селекторнай мунньахха халааны куттала суох аһарарга үлэни тиһиктээхтик тэрийэргэ, ойуур баһаарын бохсор инниттэн өртөөһүнү ыытары боборго, коронавирус туһунан араас сымыйа сураҕы тарҕатыыны кэтээн көрөргө, олохтоох нэһилиэнньэҕэ өйдөтүү үлэтин ыытарга сорудахтанна.
Елена ПОТОЦКАЯ, «Cаха сирэ» хаһыат, edersaas.ru
Хаартыскаҕа Андрей Сорокин түһэриитэ.