Доруобуйа Тырааныспар

Үлэлии сылдьан оһолломмут Сунтаар олохтооҕор саҥа массыынаны бэлэхтээтилэр

РФ Социальнай страховкалааһыҥҥа Саха сиринээҕи отделениета үлэлии сылдьан оһолломмут дьоҥҥо  сылын аайы  анал тимир көлөлөрү атыылаһан биэрэр. Быйыл «Лада Granta» диэн саҥа массыыналары өрөспүүбүлүкэ 14 олохтооҕо ылла. 

Бүгүн,  сэтинньи 29 күнүгэр, Сунтаар сэлиэнньэтигэр  үлэлии сылдьан оһолломмут Айаал Чолбодуковка анал 14-с тимир  көлөнү бэлэхтээтилэр. Тэрээһиҥҥэ РФ Социальнай страховкалааһыҥҥа Саха сиринээҕи отделениетын  управляющайын солбуйааччы Егор Алексеев кытынна. «Эрэгийиэннээҕи отделение сүрүн соругунан дьон айанныылларыгар эрэ буолбакка,  үлэлэригэр төннөллөрүгэр көмөлөһүү буолар. Маны ситиһэргэ  анал комплекс оҥоһуллубута. Онно санаторийдарга эмтэнэ баралларыттан саҕалаан  араас хабааннаах көмөлөр оҥоһуллаллар», — диэн Егор Афанасьевич быһааран биэрдэ.

«Мин 2021 сыл саҥатыгар  оһолломмутум.  Тустаах эрэгийиэннээҕи отделениеттан  төлөпүөммэр эрийэн,  Дьокуускайга кэлэн,  тимир көлөнү ыларым туһунан эппиттэригэр олус диэн долгуйбутум, үөрбүтүм.  Ахсынньы 6 күнүгэр төрөөбүт күнүм буолар, ол иннинэ  бу бэлэҕи туппутум олус үчүгэй. Тимир көлө олохпор эрэллээх көмөлөһөөччүнэн буолуо», — диэн Айаал Чолбодуков санаатын үллэһиннэ.

Ыспыраапка

2008 сылга диэри  үлэлии сылдьан оһолломмут дьоҥҥо «Ока», жигули массыыналары биэрэллэрэ. Оттон 2013 сылтан «LADA GRANTA» тимир көлөнү биэрэн саҕалаабыттара.  Бу тимир көлөлөр оһоллонон хамсаналлара хааччаттаммыт дьоҥҥо анаан тэхэньиичэскэй өттүнэн оҥоһуллан бэриллэр.  Ону тэҥэ, тимир көлөнү ылбыт тустаах дьоҥҥо кыбаартал аайы уматык атыылаһалларыгар  уонна  сэттэ сылга биирдэ тимир көлөнү хапытаалынай өрөмүөннээһиҥҥэ көмө оҥоһуллар.  Сэттэ сыл кэнниттэн  массыына хаһаайына саҥа тимир көлөнү ылар бырааптанар.

 

 

0
0
Telegram @edersaas20