Дьокуускай куорат Автодорожнай уулуссатыгар (ДСК оройуона) 6 № -дээх оскуола дьэндэйэн, харахха ыраахтан быраҕыллар. Бу кыһа былырыын үөрэх дьылын көрсө үөрүүлээх быһыыга-майгыга арыллыбыта.
Чааһынай-судаарыстыбаннай бииргэ үлэлээһин бырагырааматынан тутуллубут дьиэ уопсай иэнэ 8337 кв. миэтэрэ. Аныгы үйэ ирдэбилигэр толору эппиэттиир киэҥ-куоҥ саалалардаах, бэртээхэй бибилэтиэкэлээх, 100-тэн тахса оҕо холкутук олорон аһыырыгар анаммыт остолобуойдаах, үөрэнэргэ табыгастаах кылаастардаах.
Биһиги оскуолабыт наһаа кырасыабай, сырдык, кэрэ. Киһи манна үөрүүнэн кэлэр диэн элбэх оҕолоох ийэ Сюзанна Устинова санаатын этэр:
— Мин үс оҕолоохпун. Икки улахан кыыһым ахсыс кылааска диэри эргэ, кыараҕас оскуолаҕа үөрэммиттэрэ. Оҕолор да, төрөппүттэр да саҥа оскуолаланыахпытын наһаа баҕарар этибит. Ол баҕа санаабыт туолбутуттан үөрэбит аҕай. Өссө үөрэрим, астынарым, кыра кыыһым маҥнайгы кылааска бу оскуолаҕа киирбитэ. Онон устуоруйаҕа киирэр умнуллубат үөрүүлээх түгэҥҥэ тиксибиппит.
Киэҥ-куоҥ кыһаҕа үөрэнээччитин ахсаана элбээн иһэр чинчилээх. Былырыын манна биэс маҥнайгы кылаас арыллыбыт буоллаҕына, быйыл алтаҕа тиийдэ. Бу биһиги олорор түөлбэбит сайдан, кэҥээн иһэрин мэктиэтэ. Саҥа дьиэ бөҕө тутуллар, ыал бөҕө көһөн кэлэр. Онон саҥа кыһа саамай сөптөөх, тоҕоостоох кэмигэр тутуллубута сүргэни көтөҕөр. Оскуолабыт икки спортивнай, биир киэҥ, сырдык актовай саалалардаах, өссө хореографическай саала эмиэ баар. Таһыгар стадионнаах, спортивнай былаһааккалаах.
Маныаха ис дууһаларыттан айымньылаахтык үлэлиир педагогическай кэлэктиип төрөппүттэр санаабытын кынаттыыр, үөрэнээччилэр үөрэххэ баҕаларын күүһүрдэр. Аны, оҕолорбут талбыт куруһуоктарыгар дьарыктанар кыахтаахтар. Манна баар дуобат, ритмика, медиаустуудьуйа, ЮИД, спортивнай ориентирование, волейбол, о.д.а. Онон маннык оскуолаламмыппытыттан наһаа үөрэбит, киэн туттабыт.
Биһиги корр., «Саха сирэ», edersaas.ru