Уус Алдан улууһугар, Тулунаҕа, “Татыйык” уһуйааҥҥа бэртээхэй Лего-бэстибээл ыытыллыбытын туһунан иитээччи Татьяна Васильева иһитиннэрдэ.
—Лего-конструктор хаһан, хантан үөскээбитин медиа-презентация көмөтүнэн Варвара Васильева оҕо-аймахха олус кэрэхсэбиллээхтик, киһи эрэ сэҥээрэн истэ олоруоҕун курдук көрдөрө-көрдөрө кэпсээтэ. Ол кэннэ оҕолор хоһоон аахтылар, араас күрэхтэһиилээх оонньууларга үөрүүнэн кытыннылар. Лего-конструктор арааһа тардыллыбыта уонна “Мин дьиэ кэргэним”, “Космос уонна куйаар эйгэтэ”, “Үлэ барыта үчүгэй, идэ барыта бочуоттаах”, “Мин уонна транспорт” диэн тиэмэлэринэн быыстапка болҕомтону тарта. Тэрээһиҥҥэ оҕолор, төрөппүттэр бары олус көхтөөхтүк кыттан наһаа сэргэх, астык буолла.
Бэстибээл сүрүн ыалдьытынан оҕолор сөбүлүүр Лего-дьоруойдара Стив киирэн бырааһынньыгы өссө тупсарда. Кырачааннар сөбүлүүр дьоруойдарын ытыс тыаһынан көрүстүлэр уонна тэҥҥэ үҥкүүлэһэн үөрүүлэрэ-көтүүлэрэ өссө улаатта, — диэн кэпсээтэ. Оҕону сайыннарар маннык тэрээһиннэр элбии туралларыгар баҕарда.