Алтынньы 2-10 күннэригэр Норвегия киин куоратыгар — Ослоҕа көҥүл, гректии-римнии уонна дьахтар тустуутугар аан дойду чөмпүйэнээтэ ыытыллыаҕа. Бу күннэргэ дойдулар сүүмэрдэммит хамаандаларын састаабын чуолкайдыыллар.
Белоруссияттан кыттар хамаандаҕа кимнээх киирбиттэрэ билиннэ. Манна Саха сирин тустууга оскуолатын иитиллээччилэрэ, легионердар — Арыйаан Тютрин, Андрей Бекренев уонна Ньургун Скрябин бааллар диэн sportyakutia.ru саайт иһитиннэрэр.
Бу иннинэ уолаттар Минскэйгэ буолбут Александр Медведь бирииһигэр турнирга ситиһиилээхтик кыттыбыттара — Арыйааннаах Андрей кыһыл көмүс, Ньургун боруонса мэтээллэри ылбыттара. Турнир аан дойду чөмпүйэнээтигэр сүүмэрдииргэ биир сүрүн түһүмэҕинэн буолбута.
Инньэ гынан быйылгы аан дойду чөмпүйэнээтигэр Белоруссия өрөспүүбүлүкэтин көҥүл тустууга састааба маннык:
57 киилэҕэ — Арыйаан Тютрин;
61 киилэҕэ — Андрей Бекренев;
65 киилэҕэ — Ньургун Скрябин;
74 киилэҕэ — Азамат Нуриков;
86 киилэҕэ —Расул Тихаев;
92 киилэҕэ — Омаргаджи Магомедов;
97 киилэҕэ — Александр Гуштын;
125 киилэҕэ — Денис Хроменков.