«Саха сирин киэн туттуута» норуот бириэмийэтин «Үлэ киһитэ» номинациятыгар, финалга тахсыбыт биэс киһиттэн, бүтэһик куоластааһын түмүгүнэн, инники күөҥҥэ Амматааҕы РЭС электромонтера Михаил Лазарев таҕыста.
edersaas.ru
Уопсайа 13643 куолас киирбититтэн, Амма бэрэстэбиитэлигэр 5479 киһи куоластаата. Михаил Кузьмич «Якутскэнерго» тэрилтэҕэ 1972 сылтан үлэлиир. 1987 сылтан — Амматааҕы РЭС электромонтера. Тэрилтэ бэтэрээннэрин сэбиэтин чилиэнэ, бэрэстэбиитэллээх уорган дьокутаата.
— Куолаһым ахсаанынан Вячеслав Лукины кытта араа-бараа испитим. Ол эрээри, кинини баһыйарга эрэллээх этим. Аммам дьоно-сэргэтэ, «Якутскэнерго» тэрилтэм, бииргэ аармыйаҕа сулууспалаабыт доҕотторум, кылааһынньыктарым, аймахтарым – бары бүттүүн түһүнэн өйөөтүлэр. Маннык бырайыактар үлэ киһитин санаатын бөҕөргөтөр, сүргэтин көтөҕөр, үлэтигэр өссө кыһанан туран үлэлииргэ дьулуһууну үөскэтэр. Онон бу курдук үлэ киһитин айхаллыыр, чиэстиир бырайыактар элбии тураллара буоллар, — диэн туран «Үлэ киһитэ» номинация кыайыылааҕа Михаил Лазарев «Сахамедиа» холдинг айар үлэһиттэригэр истиҥ махталын тиэртэ.
Кулун тутар 12 күнүгэр саҕаламмыт 10 улуустан кыттыбыт 28 оробуочай идэлээх дьонтон, финалга тахсыбыт биэс киһи тыҥааһыннаахтык киирсэр куоластааһыннарын түмүгэ маннык буолла:
Михаил Лазарев — 5479 куолас, онтон 231 куолас — социальнай ситимнэргэ ✅
Вячеслав Лукин — 4668 куолас, онтон 144 куолас — социальнай ситимнэргэ ✅
Николай Попов — 1625 куолас, онтон 148 куолас — социальнай ситимнэргэ ✅
Геннадий Юрков — 1608 куолас, онтон 28 куолас — социальнай ситимнэргэ ✅
Юрий Троев — 851 куолас, онтон 37 куолас — социальнай ситимнэргэ ✅
Сотору кэминэн «Саха сирин киэн туттуута» норуот бириэмийэтин «Спортсмен» диэн номинациятыгар куоластааһын саҕаланыаҕа.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.
Бэлиэтээн эттэххэ, «Саха сирин киэн туттуута» бырайыак Саха сирин судаарыстыбаннаһын күнүгэр биллэриллибитэ. Ол курдук, алтынньыга ыытыллыбыт «Бастыҥ учуутал » номинацияҕа Чурапчы оскуолатын учуутала Владислав Кривошапкин, сэтинньигэ — «Ыччат лиидэрэ» номинацияҕа ХИФУ профсойууһун кэмитиэтин салайааччыта Артём Иванов кыайбыттара. Ахсынньыга «Быраас» номинацияҕа кыайыылааҕынан 2 №-дээх өрөспүүбүлүкэтээҕи балыыһа бырааһа Степан Тордуин, «Култуура диэйэтэлэ» номинацияҕа Сунтаарга үҥкүү бөлөҕүн салайар Августина Клакинова бэлиэтэммиттэрэ. «Бастыҥ урбаанньыт» номинацияҕа Руслан Федотов кыайыылааҕынан тахсыбыта.
Бырайыак генеральнай партнера — саха иһитин-хомуоһун пропагандалыыр «Көмүлүөк» фирма.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА саайтыттан