Майатааҕы гимназияҕа бииргэ үөрэммит Семен Алексеев, Айсен Федоров, Андрей Босиков «Ый суола» диэн музыкальнай бөлөхтөөхтөр. Семен кик-боксиҥҥа успуорт маастарыгар хандьыдаат, боксаҕа бастакы разрядтаах, улууһун аатыттан Амма спартакиадатыгар 2 миэстэ буолбута.
edersaas.ru
Кини АГИТИ-ны уонна Үрдүкү инновационнай менеджмент оскуолатын бүтэрэн баран, икки үрдүк үөрэхтээх киһи идэтинэн үлэ булбатаҕа. Ол сылдьан быстах үлэҕэ үлэлиирэ, дьон олоҕун хайдах чэпчэтиэххэ, тупсарыахха сөбүй диэн толкуйдуура. Дойдутугар маҕаһыын арыйбыта.
«Туох көстөрүнэн үлэлии сылдьан, баҕар, билигин мин аттыбар ким эрэ көмөҕө наадыйара буолуо эрээри, биһиги сатаан сибээстэспэппит диэн санаа кэлбитэ. Биисинэс-былаан суруйан, хамаанда тэринэн, ааспыт сайын «Job Job» диэн үлэһити буларга уонна быстах үлэ көрдөөччүлэргэ анаан суотабай төлөпүөн сыһыарыытын олоххо киллэрбиппит. Күн бүгүн өрөспүүбүлүкэҕэ ону 34 000 киһи хачайдаан туһанар. Кыра үлэттэн саҕалаан, 300 тыһыынча солкуобайга тутуу эбийиэгэр уот тардарга тиийэ улахан сакаастар киирэллэр.
Бу сервис босхо үлэлиир, биһиги итинтэн хамнас ылбаппыт. Саҥа дьыл кэнниттэн атын эрэгийиэннэргэ, омук сиригэр таҕыстахпытына, элбэх киһи хачайдаатаҕына, үлэбит сайдан, төлөнөн иһиэ», — диир Семен.
Уолаттар ИТ Пааркаҕа кэлэн, Акселератор В8 кыттан, хас да тургутугу ааһан, сөптөөх көмөнү ылан, билиилэрин хаҥатан, бырайыактарын салгыы сайыннараллар. Майа уолаттарын холобура хайаан да сатабыллаах хакер, программист эрэ стартаптары саҕалыыр диэн өйдөбүлү төрдүттэн уларытар.
Марианна Тыртыкова, «Саха сирэ», edersaas.ru