“Үлэ кыбаартала” креативнай кылаастар резиденнэрин ситиһиилэрин Юрий Трутнев биһирээтэ
Креативнай кластеры Саха сиригэр тутуу туһунан Ил Дархан Айсен Николаев 2020 сыллаахха Ил Түмэн мунньаҕар анал этиитигэр иһитиннэрбитэ.
Бүгүн РФ бэрэсидьиэнин Уһук Илиҥҥэ боломуочунай бэрэстэбиитэлэ Юрий Трутнев Дьокуускайга сырыытын кэмигэр “Үлэ Кыбаартала” («Квартал Труда») диэн Уһук Илин уокуругар тутулла турар бастакы тиэхиньиичэскэй пааркаҕа сылдьан, креативнай индустрия салаатыгар үлэлиир резиденнэри кытта билистэ.
Кластерга сыыппара аныгы технологиятын туһанан үлэлиир урбаанньыттар түмсэн үлэлээн эрэллэр. Ол курдук, манна аниматордар, худуоһунньуктар, киинэ эйгэтигэр айар үлэлээх дьон номнуо «Медиа-лаб» диэн салаанан үлэлээн эрэллэр. Кинилэргэ анаан аныгы сыыппара технологиятынан таҥыллыбыт араас устуудьайалар үлэлэрин саҕалаабыттар.
РФ бэрэсидьиэнин Уһук Илиҥҥэ боломуочунай бэрэстэбиитэлэ Юрий Трутневка кластер резиденнэрэ бэйэлэрин үлэлэрин билиһиннэрдилэр. Биологическай наука хандьыдаата, профессор Борис Кершенгольц учуонайдар коронавирустан харыстыыр уонна эмтиир “Бетукладин” эми айбыттарын билиһиннэрдэ.
Оттон “Биотехнологическай компания” ХЭУо дириэктэрэ Леонид Жожиков искусственнай быар ыарыһахтар кыһалҕаларын хайдах чэпчэтиэҕин туһунан кэпсээтэ.
Өрөспүүбүлүкэ сайдыытын корпорациятын генеральнай дириэктэрэ Афанасий Саввин “Үлэ кыбаарталын” креативнай бырайыактарын билиһиннэрдэ.
Саха сиринээҕи “Киинэ тиһигэ” автономнай тэрилтэ дириэктэрэ Петр Чиряев “Рядовой Чээрин” киинэни устууга туттуллубут аныгы технология көрүҥнэрин, “Музыканнар” дьиэлэрэ” оскуола дириэктэрэ Кирилл Третьяков билиһиннэрдилэр.
“РФ бэрэсидьиэнин Уһук Илиҥҥэ боломуочунай бэрэстэбиитэлэ Юрий Трутнев бу сырыыта эһиги тэрилтэҕитигэр туох суолталааҕый?” – диэн ыйыппыппар, Өрөспүүбүлүкэ сайдыытын корпорациятын генеральнай дириэктэрэ Афанасий Саввин санаатын маннык үллэһиннэ:
— Юрий Петровиһы кытта биһиги бу бастакы көрсүһүүбүт буолбатах. Бэс ыйын 2 күнүгэр РФ Бэрэсидьиэнин боломуочунайыгар саҥа саҕалааһыннарбытын билиһиннэрбиппит. Ол мунньах кэнниттэн Саха сирэ “Биир кэлим субсидия” бырагыраама чэрчитинэн «Үлэ Кыбаартала” креативнай кластеры сайыннарыыга 413 мөлүйүөн солкуобайы ылыахтаах. Онон бу оробуочай сырыытыгар РФ бэрэсидьиэнин Уһук Илиҥҥэ боломуочунай бэрэстэбиитэлэ Юрий Трутнев кластер резиденнэрин үлэлэрин сиһилии көрдө-иһиттэ уонна ыытар үлэбитин биһирээбитин бэлиэтээтэ.
«Биһиги сүрүн сыалбыт — өрөспүүбүлүкэбитин күүстээх айти салаалаах диэн ааттатар эдэр көлүөнэни иитэн таһаарыы. Саха сирин экэниэмикэтигэр креативнай индустриялар номнуо кылааттарын киллэрэн эрэллэр. Бүгүҥҥү күҥҥэ бу эйгэҕэ алта тыһыынчаттан тахса урбаанньыт уонна тэрилтэ баар, 41 тыһыынчаттан тахса киһи үлэлиир. Биһиги дьон олоҕо сайдарыгар үлэлиибит, онуоха туох баар усулуобуйаны тэрийэр кэм кэллэ», — диэн Ил Дархан Айсен Николаев эттэ.
«Үлэ Кыбаартала” креативнай кластер 2022 сыл муус устар ыйыгар Саха сирэ төрүттэммитэ 100 сылын туолар күнүгэр үөрүүлээх быһыыга-майгыга аһыллара сабаҕаланар.
Елена ПОТОЦКАЯ, «Саха сирэ» хаһыат, edersaas.ru