Үлэ көрдөөччүлэргэ анал дьаарбаҥка буолуоҕа

Бөлөххө киир:

Муус устар 21-22 күннэригэр СӨ бырабыыталыстыбата уонна Арктика, Уһук Илин сайдыытын корпорацията үлэ көрдөнө сылдьар эдэр дьоҥҥо “Траектория карьеры” диэн өрөспүүбүлүкэтээҕи үһүс дьаарбаҥканы ыытыаҕа. Тэрээһин интэриниэт ситиминэн быһа сибээһинэн барыаҕа.

Тэрээһиҥҥэ Нэһилиэнньэ дьарыктаах буолуутун судаарыстыбаннай кэмитиэтэ, “Мин үлэм” куорат уокуруктарын управлениета, Анал идэҕэ үөрэтии киинэ, Урбаан министиэристибэтэ кытталлар. Үлэ миэстэтин көрдүүр дьоҥҥо барыта 332 хампаанньа үлэтин билиһиннэриэҕэ. Дьаарбаҥкаҕа барыта 2500-тэн тахса үлэ миэстэтэ баар. Тэрээһиҥҥэ “Золото Селигдара”, “Эльгауголь”, “Якутуголь”, “Полюс Алдан”, “ЯТЭК”, о.д.а. хампаанньалар кытталлара биллэр.

Нэһилиэнньэ дьарыктаах буолуутун судаарыстыбаннай кэмитиэтэ иһитиннэрбитинэн, бу тэрээһиҥҥэ 4500 кэриҥэ киһи кыттара биллэр. Киин сиртэн ыраах сытар нэһилиэнньэлээх пууннары хабар сыалтан өрөспүүбүлүкэ 12 улууһугар 42 сиртэн интэриниэт ситимигэр холбонуу барыаҕа. Маннык пууннартан 300-тэн тахса киһи кыттыаҕа.

Ханнык хампаанньалар туох үлэтин биэрэллэрин туһунан “ЯрмаркаВакансийЯкутии.рф” диэн анал порталга киирэн көрүөххэ сөп. Порталга үлэлэр барыта 14 хайысханан арахсан тураллар. Ол курдук, тыа хаһаайыстыбатын, коммунальнай хаһаайыстыбаны, энергетиканы, тырааныспар, тутуу, суол хаһаайыстыбаларын, бырамыысыланнаһы, цифровой эйгэни, доруобуйа харыстабылын, о.д.а. туспа арыйан көрүөххэ сөп.

“Траектория карьеры” дьаарбаҥка чэрчитинэн, маастар кылаастар, лиэксийэлэр, вебинардар, эспиэрдэри кытары көрсүһүүлэр буолуохтара.

Дьаарбаҥкаҕа кыттыан баҕалаахтар бу электроннай почтаҕа workyakutia@sakhaczn.ru бэйэҕит ааккытын-суолгутун, дааннайдаргытын толору суруйан ыытыаххытын сөп. Тэрийэн ыытааччылар кыттааччылары “Ярмаркавакансийякутии.рф” порталга киирэн регистрацияланарга ыҥыраллар. Дьаарбаҥка өрөспүүбүлүкэ дьарыктаах буолуутун киинин “Ютуб” ханаалыгар быһа сибээһинэн көстүөҕэ.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0