Саха сирин үрдүнэн эпидемиологическай балаһыанньа уустук. Өрөспүүбүлүкэтээҕи суһал ыстаап улуустарга баар суһал ыстааптары кытары мунньахтаан, ханнык миэрэлэри киллэрэр туһунан быһаарыстылар.
Ил Дархан Айсен Николаев улуус баһылыктарыгар коронавируснай инфекцияны тарҕаппат миэрэлэри күүһүрдэллэригэр сорудахтаата.
Ыалдьыбыт түбэлтэлэри ырытан көрөн баран, сүрүннээн үлэлиир тэрилтэлэригэр сыстыһаллар, онтон тиийэн дьиэ кэргэннэрин сыһыараллар диэн түмүккэ кэлбиттэр. Онон тэрилтэлэргэ тиийэн үлэлиири аҕыйатар туһунан быһаарыы ылылынна.
Бүддьүөт тэрилтэлэригэр үлэһиттэрин 50%—гар тиийэ тэйиччиттэн, дьиэттэн олорон үлэлиир усулуобуйаны олохтуулларыгар сүбэлээтилэр. Ону улуус баһылыктара уонна СӨ үлэҕэ, социальнай сайдыыга министиэристибэтэ хонтуруоллуохтаахтар. Сарсын баһылыктар хас тэрилтэ төһө үлэһитин дьиэҕэ олорон үлэлиир эрэсиимҥэ ыыппытын туһунан Ил Дархаҥҥа отчуоттуохтаахтар. Министиэристибэ ити нуорманы тутуһарга анаммыт бирикээстэр сөп түбэһэллэрин бэрэбиэркэлиэхтээх.
Маннык миэрэ хантаактаһыыны аҕыйатан, ыарыы күүскэ тарҕанарын тохтотор, балыыһалар, быраастар ноҕуруускаларын чэпчэтэр соруктаах.
Сорох лабораториялар күнүстэри-түүннэри үлэлииллэр. Дьокуускайга көмпүүтэр томографиятыгар түһэрэр биир аппараат эмиэ күнүстэри-түүннэри үлэлиир, атыттар үлэлиир бириэмэлэрэ уһаан биэрдэ диэн өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрэр.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн