Балаҕан ыйын 27 күнүгэр Саха сирин үрдүнэн устуоруйаҕа киирбит улахан бэлиэн күн – Саха Өрөспүүбүлүкэтин Судаарыстыбаннаһын күнэ бэлиэтэммитэ. Ньурбалар өрөспүүбүлүкэ судаарыстыбаннаһа атаҕар туруутугар уонна сайдыытыгар ханнык даҕаны оройуоннааҕар элбэх салайааччыларбыт бэйэлэрин сүдү кылааттарын киллэрбиттэринэн чахчы даҕаны киэн туттабыт.
edersaas.ru
Биһиги билэрбит курдук, Максим Аммосовы, Платон Ойуунускайы кытта сэргэ биир дойдулаахтарбыт Степан Васильев, бырааттыы Семен-1 уонна Семен-2 Донскойдар, Михаил Мегежекскэй, Александр Габышев өрөспүүбүлүкэни салайсыбыттара. Итиэннэ кэлин биллиилээх салайааччылар Семен Сюльскэй, Александра Овчинникова, Анастасия Данилова уонна Варвара Петрова улахан эппиэттээх дуоһунастарга үтүө суобастаахтык үлэлээн өрөспүүбүлүкэ сайдыытыгар дьоһун кылааттарын киллэрсибит үтүөлээхтэр.
ххх
Алексей Михайлович Иннокентьев Ньурба улууһун баһылыгынан талыллан үлэлээбитэ балаҕан ыйыгар номнуо 3 сылын туолла. Итинэн сибээстээн, бу кэмҥэ улууска норуот хаһаайыстыбатын сүрүн салааларыгар барбыт үлэлэр кэккэ түмүктэрин билсиэҕиҥ.
Туох-ханнык иннинэ улуус инники сайдыытыгар улахан суолталаах түгэннэринэн 2018 cыллаахха «АЛРОСА» АХ кытта Ньурба улууһун социальнай-экэнэмиичэскэй сайдыытыгар бииргэ үлэлиир туһунан сөбүлэһии түһэрсиллиитэ, Ньурба улууһун 2032 сылга диэри социальнай-экэнэмиичэскэй сайдыытын Стратегията оҥоһуллан бигэргэниитэ буолаллар.
Дьон сүөһү иитэр баҕалаах
Сыллата тыа хаһаайыстыбатыгар улуус бүддьүөтүттэн 100 мөлүйүөн кэриҥэ солкуобайдаах үп көрүллэн кэллэ. Өрөспүүбүлүкэ ханнык да улуустарыттан ордук элбэх көмө оҥоһуллар. Өрөспүүбүлүкэ үбүн кытта холбоон, сылын аайы барыта 300-чэ мөлүйүөн солкуобай бу салааҕа ананар. Сири кытта үлэҕэ өрөспүүбүлүкэтээҕи сүөһү аһылыгын оҥоруу бырагырааматыгар киирэн, 2 сыл устата улуустан уонна Тыа хаһаайыстыбатын министиэристибэтиттэн манна 10-нуу мөлүйүөн көрүллүбүтүн түмүгэр «Ньурбатааҕы сүөһү аһылыгын хампаанньата» тэрилтэ тиэхиньикэнэн толору сэбилэнэн атаҕар турда. Инникитин дьон түргэнник ситэр салаанан ордук көхтөөхтүк дьарыктанарыгар усулуобуйа тэрийэн, бурдугу уонна элбэх сыллаах от сиэмэтин ылан чэпчэки сыанаҕа атыылыырга µлэ бастакы түһүмэҕэ саҕаланна. Быйыл барыта 110 гааҕа эбиэс уонна ньэчимиэн бурдукка анаан ыһыллыбыта, хомуллан бүттэ. Итини таһынан, 290 гааҕа элбэх сыллаах от ыһылынна.
Улуус тэриллиилээх хаһаайыстыбаларын үлэтэ мэлдьи болҕомто киинигэр тутуллар. «Күндээдэ» ААУо үлэтин көрдөрүүтүнэн өрөспүүбүлүкэ бастыҥ үлэлээх бөдөҥ хаһаайыстыбаларын ахсааныгар киирдэ, хамнас төлөбүрүгэр 2019 сыл түмүгүнэн 4-с миэстэҕэ сылдьар. Ил Дархан Айсен Николаевка туруорсан, Степан Васильев аатынан сылгы собуотун өрөспүүбүлүкэ бас билиитигэр көһөрүү үлэтэ бара турар. Сылгы собуота «Саха сүөһүтэ» хааһына тэрилтэтин иһинэн киирэн, 2021 сылтан өрөспүүбүлүкэттэн толору үбүлэнэр буолуохтаах.
Нүөлсүтүү үлэтин бастакы уочараттаах соругунан тыа хаһаайыстыбата аналлаах сирдэргэ ууну киллэрии буолар. Сир-дойду кэнники кураан сылларга кууран-хатан, сорох нэһилиэктэргэ сүөһүнү уулатар даҕаны кыһалҕалаах буолла, улуустан көмө харчы көрүлүннэ, мелиорация сэбиэтэ тэрилиннэ.
Тыа хаһаайыстыбатынан дьарыктаныан, тус көмөлтө хаһаайыстыбаларын кэҥэтиэн баҕалаах ыалларга көдьүүстээх көмө саҥа көрүҥүн олохтоотубут. «Күндээдэ» ААУо уонна «Ньурба-Агро» МТС 100-тэн тахсалыы тарбыйахтара сайаапкаларынан дьоҥҥо босхо түҥэтилиннилэр. Барыта 600-тэн тахса сайаапка киирбитэ, бу дьон сүөһү ииттэр баҕалааҕын көрдөрөр.
Иллэрээ сыллааҕыта саахалламмыт Көтөр фабриката улуус уонна өрөспүүбүлүкэ көмөтүнэн өрүттэн, былырыыҥҥыттан толору кыамтатыгар тахсан үлэлии турар.
Улахан болҕомто түргэнник ситэр салаалары сайыннарарга туһуланар. Быйыл Дьокуускайтан Көтөр фабрикатын нөҥүө чоппууска уонна хаас оҕотун аҕалтаран түҥэттибит. Сэттэ агро-оскуола түргэнник ситэр салааҕа уонна мүөттээх ыҥырыалары иитиигэ утумнаахтык үлэлэһэр.
Быйыл окко уонна сиилэскэ былааммыт туолла. Сайын курааннаан хортуоппуйга уонна оҕуруот аһыгар былаан туолбата. 2 сыл устата үүккэ киилэтигэр 5-тии солкуобай улуустан эбии төлөбүр олохтообуппут.
Тутууга улахан хаалыы тахсыбата
Тутуу сайдыы төрдө буоларын быһыытынан, бу салааҕа эмиэ уһулуччу болҕомто ууруллар. 2017-2019 сылларга 33 тыһыынчаттан тахса кв. миэтэрэ иэннээх 297 олорор дьиэ үлэҕэ киирбитэ. Быйыл хоруона хамсыгынан сибээстээн хааччахтыыр миэрэлэр олохтоммуттарын да иһин, тутуу үлэтигэр улахан хаалыы таһаарыллыбата. Араас сиртэн үбүлэнэн (өрөспүүбүлүкэ, улуус уонна улууска алмаастан киирэр үп суотугар итиэннэ муниципальнай-чааһынай бииргэ үлэлээһин бэрээдэгинэн) элбэх тутуу үлэҕэ киирдэ уонна тутуллан бүтэн эрэр.
Ньурба куоракка «Демография» национальнай бырайыагынан саамай улахан уонна күүтүүлээх – 280 миэстэлээх оҕо уһуйаана тутулла турар, быйыл ахсынньы 25 күнүгэр үлэҕэ киирэрэ былааннанар. Ону сэргэ, Ньурба куоракка 250 миэстэлээх дыраама тыйаатыра (эһиил үлэҕэ киириэхтээх) уо.д.а. тутулла тураллар.
Быйыл «Хаарбах уонна саахалланар туруктаах дьиэлэртэн көһөрүү» бырагыраама салгыы үбүлэнэн, Ньурба куоракка Кузаков уулуссатыгар, Вертолеткаҕа саҥа дьиэлэр эһиил үлэҕэ киирэллэрэ былааннанар. Өрөмүөннэммит уонна толору хааччыллыыга киирбит дьиэ ахсаана 263 тэҥнэстэ.
Үөрэх уонна култуура эйгэтин эбийиэктэригэр сыллата үгүс өрөмүөн үлэтэ барар.
Иллэрээ сыл арендаҕа атын улууска үлэлии сылдьыбыт аспаал-бетон собуоппутун Ньурбаҕа аҕалтаран, үһүс сайынын куорат суолларыгар үлэлэттибит. 3 сыл устата Ньурба куорат уонна Антоновка уулуссаларын аспааллыырга барыта холбоон 200 мөлүйүөн кэриҥэ солкуобайдаах үбү ыыттыбыт.
Улуус дьаһалтатын уонна «Партнер» ХЭТ икки ардыгар концессионнай сөбүлэһиинэн Хатыҥ Сыһыы-Сайылык 52 килэмиэтир усталаах суола хапытаалынайдык өрөмүөннэнэн, суол хаачыстыбата олус тубуста. Эмиэ «Партнер» ХЭТ концессионнай сібµлэһиинэн Хатыы-Маалыкай суолун өрөмүөннүү сылдьар.
«Тыа сирин туруктаах сайдыыта» федеральнай бырагырааманан 42 мөлүйүөн солкуобай көрүллэн, Ньурба-Сүлэ суолун хапытаалынай өрөмүөнэ бүттэ.
Олорор дьиэни булунууга эбэтэр дьиэ туттарга социальнай төлөбүр сибидиэтэлистибэтин 52 эдэр ыал тутта.
Ыраахтан үөрэниигэ кыһалҕаны көрсүбэтибит
2019 сыллаахха «Ростелеком» Саха сиринээҕи салаатын кытта сөбүлэһиинэн 2 сыллаах үлэ түмүктэммитэ. Федеральнай суолтан туора сытар кытыы нэһилиэктэргэ «оптоволокно» салаатын тиэрдэргэ 38 мөлүйүөн солкуобайынан улуус кыттыспыта. Бу түмүгэр улуус бары нэһилиэнньэлээх пууннарыгар оптоволоконнай сибээс ситимэ тардыллыбыта. Ньурба аҕыйах да киһилээх нэһилиэнньэлээх пууннара эмиэ оптиканан хааччыллан, бастакы «сыыппаралаах» оройуонунан буолла.
«Билайн» баар 7 нэһилиэгэр GPON диэн Интэриниэт киирдэ. Быйыл 8 нэһилиэк киириэхтээх, кэлэр сылларга уочаратынан киирэн иһиэхтээхтэр. Маннык дьаһаныы кэмигэр ыытыллыбытын ааспыт үөрэх дьыла көрдөрбүтэ. Оҕолор дьиэттэн үөрэниилэригэр сибээс өттүгэр кыһалҕаны көрсүбэтилэр.
Нэһилиэнньэ биһирэбилин ылбыт көмө
Алексей Иннокентьев улуус баһылыгын быыбарын бырагырааматыгар сөп түбэһиннэрэн, улууска алмаастан киирэр үп улуус нэһилиэнньэтин туһугар үлэлиэхтээх диэн дьон-сэргэ туруорсуута олоххо киирэ турар.
Тыа сиригэр олорор социальнай көмүскэлгэ наадыйар дьоммутугар көмөнү оҥорорго бүтүн Арассыыйа үрдүнэн соҕотох бырайыак олоххо киллэриллэр. Тыыл бэтэрээннэрэ, I группалаах инбэлииттэр, кэлин ДЦП-лаах уонна уҥуох-сүһүөх ыарыылаах инбэлиит оҕолор, бойобуой дьайыылар кыттыылаахтара олорор чааһынай дьиэлэрин өрөмүөннүүргэ эбэтэр толору хааччыллыыны киллэрэргэ анаан, үһүс сылын улуустан үп көрүллэр. Барыта 250-тан тахса дьиэ өрөмүөннэннэ эбэтэр толору хааччыллыыга киллэрилиннэ. Бу көмө нэһилиэнньэ улахан биһирэбилин ылбытын бэлиэтиэххэ сөп.
Өрөспүүбүлүкэ улуустарыттан маҥнайгынан быйылгыттан улууска мэлдьи олорор уонна регистрациялаах, 4-с уонна онтон кэнники оҕотун төрөөбүт (иитэ ылбыт) дьиэ кэргэттэргэ 100 тыһыынча солкуобай кээмэйдээх биир кэмнээх көмө оҥоһуллар. Билиҥҥитэ «Ньурбатааҕы дьиэ кэргэн хапытаала» 39 ыалга бэрилиннэ.
«АЛРОСА» АХ 1% аахсыйатын дивиденин суотуттан матырыйаалынай көмөҕө быйыл саҥа балаһыанньа ылыллан олоххо киирдэ. Бу сорукка 2,5 мөлүйүөн солкуобай кэриҥэ ананар. Искэн ыарыылаах дьон эмтэнэ баралларыгар 100 тыһыынча солкуобай уонна итинтэн элбэх үп бэриллэр буолла.
… Биирдиилээн кыһалҕалар син бааллар
Доруобуйа харыстабыла тыын суолталааҕын өйдөөн, улуустан көмө эмиэ оҥоһулла турар. Маалыкай уонна Антоновка учаастактааҕы балыыһаларыгар «Суһал көмө» массыыната бэриллибитэ. Маалыкай уонна Марха учаастактааҕы балыыһаларыгар куустанан лабораториялар баар буолалларын хааччыйарга анаан, анализатордар ылыллыбыттара. Антоновка балыыһатыгар тииһи эмтиир кэбиниэт ылан бэриллибитэ. 2016 сылтан Дьокуускайдааҕы мэдиссиинискэй кэллиэс Ньурбаҕа үлэлиир салаатыгар эмчиттэр аттестацияны ааһалларыгар көмөлөөх Симуляционнай киин тэрилиннэ, тус сыаллаах муниципальнай бырагырааманан толору наадалаах тэриллэринэн хааччылынна. Быйылгыттан «фельдшерскэй дьыала» диэн идэҕэ үөрэтэр 25 киһилээх бөлөх аһылынна.
2017-2019 сылларга чопчу хайысхаларынан идэтийбит быраастарынан хааччыллыы наһаа мөлтөх этэ. Оройуон киин балыыһатын уонна Доруобуйа харыстабылын министиэристибэтин кытта бииргэ үлэлээһин түмүгэр быраастарынан хааччыллыы 79% тиийдэ. Улуус суотугар тус сыаллаах бырагырааманан килиниичэскэй ординатураҕа 2 бырааһы үөрэттэрдибит (лор, КДЛ бырааһа). Билигин хас биирдии учаастактааҕы балыыһаҕа быраас баар буолла. Ол эрээри, биирдиилээн кыһалҕалар син-биир бааллар.
Сылааһы биэрэр пууннарга холбонуохтара
Ньурба к. Вертолетка микро-оройуонугар уонна Амакинкаҕа туспа теплопууннар тутулуннулар, теплотрассалара тардылыннылар. Бастакы теплопуун Вертолетка микро-оройуонугар тутуллубут элбэх кыбартыыралаах 8 дьиэни сылытарын таһынан, саҥа эбийиэктэргэ анаан бэлэмнэннэ. Итиннэ 280 миэстэлээх саҥа дьыссаат, тутуулара былааннанар саахалланар туруктаах уонна хаарбах дьиэлэртэн көһөрүү бырагырааматынан 2 дьиэ, 500 миэстэлээх оскуола холбонуохтара. Ньурба биир сүрүн кыһалҕатын — кирдээх уулары таһыы кыһалҕатын быһаарар инниттэн, канализационнай-ыраастыыр ыстаансыйа (КОС) тутуутугар 3 өрүттээх концессионнай сөбүлэһии илии баттаммыта. 3 источниктан үбүлэнэр эбийиэк – улуус, инвестор быһыытынан өрөспүүбүлүкэ кыттыһар. «ЖКХ-Альтернатива» ХЭТ бэйэтин үбүн суотугар оборудованиетын аҕала турар. Быйыл КОС тутуута саҕаланыахтааҕа, ол эрээри бырайыакка уларыйыы киирэринэн сибээстээн, арыый уталыйда. Октябрьскай нэһилиэк олохтоохторун туруорсууларын учуоттаан, КОС ыраастаммыт уутун ыытарга турбатын 1,5 килэмиэтиртэн тахса 7 килэмиэтиргэ диэри уһатыллан биэрэр. Комсомольскай уулусса уонна Энергетик кыбаарталыгар ыраастыыр-насоснай ыстаансыйа оҥоһуллан, оллекторынан КОС-ка холбонуохтаах. КОС бырайыага уларытыллан, эбии үбэ көрүллэн, 2021 сыл бүтэһигэр эбэтэр 2022 сыл саҥатыгар үлэҕэ киллэриэхпит.
Хамсык кэмигэр урбаанньыттарга өйөбүл оҥоһулунна
Улуус дьаһалтата тыа хаһаайыстыбатын департаменын, социальнай көмүскэл управлениетын, дьоҕус урбааны өйүүр Киини уонна Үлэлээх буолуу киинин кытта түһэрсибит 5 өрүттээх сөбүлэһиитин олоххо киллэрии үлэтэ салҕанар. Муниципальнай тэриллиилэргэ үлэ миэстэлэрин тэрийиигэ, дьон үлэлээх буоларыгар көмөлөһүүгэ үп көрүллэр. Аҥардас 2019 сыллаахха социальнай көмүскэл управлениетынан кыаммат дьиэ кэргэттэргэ уонна кыаммат, соҕотоҕун олорор дьоҥҥо судаарыстыбаннай көмөнү оҥорорго 48 социальнай хантараак түһэрсиллибитэ. Ол иһигэр 10 хантараагынан тус көмөлтө хаһаайыстыбаны тэрийиигэ (кэҥэтиигэ): ынах сүөһүнү уо.д.а. иитиигэ, оҕуруот астарын үүннэриигэ, тыраахтыры, косилканы уо.д.а. булунарга, 33 хантараагынан нэһилиэнньэҕэ араас өҥөлөрү оҥорууга (столярнай сыах, иис, хаартыскаҕа түһэрии уо.д.а.). 2020 сыл тохсунньу 1 күнүнээҕи туругунан улууска 653 урбаанньыт баар. Коронавирус инфекцията тарҕаныытын бохсорго туһуламмыт харантыын миэрэлэрэ саҕаланыахтарыттан өрөспүүбүлүкэ улуустарыттан биир бастакынан урбаанньыттарга улуус өттүттэн чопчу элбэх көмө оҥоһуллубута. Дохуоттарын сүтэрбит кэмнэригэр аренда төлөбүрүн, хомунаалынай төлөбүрдэрин 1 ыйдааҕы ороскуоттара толуйуллубута. Улуус Сүбэтин дьокутааттарынан муниципальнай эбийиэктэргэ олохсуйан үлэлиир урбаанньыттар мал-сал нолуогуттан босхоломмуттара. Дьону, таһаҕаһы таһыынан, производствонан, тыа хаһаайыстыбатынан, олох-дьаһах өҥөлөрүн дьарыктанар урбаанньыттарга оройуоннааҕы урбааны өйүүр пуонда нөҥүө 4%-наах кирэдьиит бэриллэр. ИМБТ («Иные межбюджетные трансферты») бырагырааматынан 2019 сыл нэһилиэктэргэ саҥа үлэ миэстэлэрин тэрийэргэ 20 мөлүйүөн солкуобай көрүллэн (улахан нэһилиэктэргэ – 2-лии мөлүйүөн солкуобай, кыра нэһилиэктэргэ — 1-дии мөлүйүөн солкуобай), 22 бырайыак олоххо киирдэ. Бу түмүгэр 61 киһи бастайааннай үлэлээх, ону таһынан 125 киһи сезоннай үлэлэргэ тардыллыбыттара. Быйыл, хомойуох иһин, объективнай биричиинэлэринэн сибээстээн, бу бырагырааманы үбүлээһин тохтотуллан турар. Улууска 2 газовай саппараапка, кыһыҥҥы тэпилииссэ, көһө сылдьар киинэ тыйаатыра, овощехранилище, химчистка, миэбэл сыахтара курдук саҥа хайысхалар тэриллэн үлэлииллэр. Улууска 11 оскуола бииисинэс-инкубатора тэриллэн, улуус өйөбүлүн, үбүлээһинин ылаллар.
Быйыл биллэриллибит Үөрэхтээһин сыла 2021 сылга салҕаныаҕа
Сыллата улуус бүддьүөтүн улахан аҥара үөрэх эйгэтигэр тиксэр. Үөрэх тэрилтэлэрин матырыйаалынай-тэхиниичэскэй базатын бөҕөргөтүүгэ, учууталлар идэлэрин таһымын үрдэтиигэ, үөрэх хаачыстыбатын тупсарыыга үлэ тиһигин быспакка ыытыллар. Үөһээ этиллибитин курдук, үлэҕэ киирбит уонна тутулла турар эбийиэктэр үгүстэрэ — үөрэх эйгэтин киэннэрэ. Национальнай бырайыактар күүскэ үлэлээн эрэллэр. Былырыын Марха уонна Маалыкай оскуолаларын базатыгар «Точка роста» сыыппаралаах уонна профильнай үөрэх кииннэрэ аһылыннылар. Балаҕан ыйын 26 күнүгэр Уһук Илиҥҥэ маҥнайгынан Ньурбаҕа Оҕо научнай-тэхиниичэскэй айымньытын киинин базатыгар «IT-куб» — сыыппаралаах үөрэхтээһин киинэ аһылынна. Сыл устата 400-тэн итэҕэһэ суох оҕо 6 хайысханан Интэриниэт-технологияларга, программированиеҕа уонна робототехникаҕа дьарыктанар буолуохтара. Итини таһынан сыл устата 1500-тэн тахса оҕо маассабай тэрээһиннэринэн хабыллыахтара. Манна үлэлиир дьоммутун Хабаровскайга ыытан үөрэттэрдибит. Эмиэ бу аҕыйах хонуктааҕыта «Точка роста» сыыппаралаах уонна профильнай үөрэх кииннэрэ Антоновка уонна Хорула оскуолаларыгар аһылыннылар. Былырыын маннык кииннэр Маалыкай уонна Марха оскуолатыгар тэриллэн тураллар. Малдьаҕар оскуолатын 100, үөрэх бастакы наркома С.Н.Донской-2 төрөөбүтэ 125 сылларыгар анаан итиэннэ хамаанданан эдэр учууталлары аҕалан 3 сыл устата олохсуйан үлэлиир усулуобуйаларын тэрийэн, Малдьаҕар нэһилиэгин өрө тардар сыалтан, «Тыа оскуолатын учуутала» пилотнай бырайыагы олоххо киллэрии саҕаланна. Быйыл биллэриллибит Үөрэхтээһин сыла 2021 сылга эмиэ салҕаныаҕа.
Тыйаатыр күүтүүлээх дьиэтин тутуу эһиил түмүктэниэхтээх
2018-2019 сылларга нэһилиэктэр ортолоругар ыытыллыбыт улахан бириистэрдээх култуура-успуорт бэстибээлэ улуус култуурунай-уопсастыбаннай олоҕор улахан сэргэхсийиини таһаарбыта уонна улуус нэһилиэктэригэр дьону сомоҕолообута. Кыайыылаахтарга УАЗ микроавтобустар, призердарга «Синтай» дьоҕус тыраахтырдар уонна буровой установкалар бэриллибиттэрэ. Быйыл коронавируһунан сибээстээн, бэстибээл уо.д.а. тэрээһиннэр ыытыллыбатылар.
Култуура эйгэтин тэрилтэлэрин матырыйаалынай-тэхиниичэскэй базатын бөҕөргөтүү үлэтэ салҕанна. Ньурба к. улуустааҕы киин бибилэтиэкэ уонна Ксенофонт Уткин аатынан норуоттар доҕордоһууларын мусуойа уруккута кырыылыыр-ювелирнай собуот таас дьиэтигэр көһөрүллэн олороллор. Ускуустуба оскуолатын сорох кылаастарын үөрэтэргэ анаан, «АЛРОСА-Ньурба» ААУо дьиэтиттэн 9 кэбиниэт бэриллибитэ. Ускуустуба оскуолатыгар «Култуура» национальнай бырайыагынан, «Култуура эйгэтэ» регионнааҕы бырайыак чэрчитинэн 5 мөлүйүөн 189,6 тыһыынча солк. көрүллэн, музыкальнай үнүстүрүмүөн, тэрил уонна үөрэх литературатын ылыыта бэлиэ түгэн уонна улахан ситиһии буолбута. Бу үбүнэн 2 рояль, пианино, домралар, балалайкалар, музыкальнай аппаратура, үөрэх литературата ылыллыбыта, үөрэх миэбэлэ саҥардыллыбыта. Кэккэ нэһилиэктэргэ үлэлиир норуот айымньытын дьиэлэрэ матырыйаалынай-тэхиниичэскэй базаларын бөҕөргөтүүгэ субсидия куонкуруһугар кыттыы түмүгэр уонна федеральнай партийнай бырайыагынан матырыйаалынай-тэхиниичэскэй базаларын саҥартылар, көрөөччүлэр кириэһилэлэрин, о.д.а. миэбэли ыллылар. Ньурба куоракка тутулла турар, 530 мөлүйүөн солкуобай суумалаах дыраама тыйаатырын дьиэтэ 2021 сыл 4-с кыбаарталыгар үлэҕэ киирэрэ былааннанар. Бу эбийиэк улуус туруорсуутунан уонна Ил Дархан Айсен Николаев өйөбүлүнэн, «АЛРОСА-Ньурба» ААУо 10%-наах аахсыйатын атыытын үбүнэн тутуллар.
«Саха сирэ» хаһыат, edersaas.ru анаан Геннадий АНТОНОВ
Ньурба