Балаҕан ыйын 21 күнүгэр тэриллибит Үлэ Дьоруойа Варвара Устинованы чиэстээһиҥҥэ анаммыт үөрүүлээх мунньахха Ил Дархан Егор Борисов, улуустар баһылыктара, норуот дьокутааттара, ойуур хаһаайыстыбатын үлэһиттэрэ кыттыыны ыллылар.
Саха сирин баай хара тыата Россия ойуурун саппааһын биэс гыммыт биирин ылар, билиҥҥи килиимэт сылыйыытын кэмигэр бэйэтин күөх маассатынан Аан дойду килиимэтин, экологиятын туруктаах оҥорууга улахан оруоллаах. Дэлэҕэ “Саха сирэ — Аан дойду тыҥата” дэниэ дуо? Биһиги ойууру көрөөччүлэрбит итинник улахан эппиэтинэскэ сылдьалларын уонна тустаах эбээһинэстэрин үтүө суобастаахтык толороллор. Ону дойду салалтата сиэрдээхтик сыаналаабытын түмүгэр, Россияҕа Экология уонна тулалыыр эйгэ харыстабылын сылынан саамай бастыҥ үлэлээх Хаҥаластааҕы ойуур хаһаайыстыбатын лэсниичэйэ Варвара Устинова Үлэ Дьоруойа буолар үрдүк чиэскэ тиксибитин Егор Афанасьевич тоһоҕолоон бэлиэтээтэ.
— Биһиги ойуур хаһаайыстыбатыгар өссө улахан болҕомтобутун ууруохтаахпыт. Сыллата элбэх тыа баһаара турар. Биллэрин курдук, бу салааҕа элбэх боломуочуйа федеральнай бас билиигэ бэриллэн турар да буоллаллар, эһиги тустаах аналгытын үтүө суобастаахтык, дьоһуннук толороҕут, — диэтэ Ил Дархан ойуур хаһаайыстыбатын бары үлэһиттэригэр туһаайан итиэннэ Варвара Устинованы дойду үрдүкү наҕараадатынан эҕэрдэлээн туран, өрөспүүбүлүкэ Баһылыгын бириэмийэтин туттарда.
— Дьоруой буолуу мин соҕотох тус бэйэм эрэ үөрүүм, ситиһиим буолбатах, бу — мин биир идэлээхтэрим, өрөспүүбүлүкэ ойуурун хаһаайыстыбатын бары үлэһиттэрин сыралаах үлэлэрин, өрөспүүбүлүкэ салалтата Айылҕаны, тулалыыр эйгэни харыстааһыҥҥа, баай хара тыаны араҥаччылааһыҥҥа ыытар үлэтин билинии, — диэтэ Варвара Михайловна.
Чиэстээһиҥҥэ Дьоруой үлэтин-хамнаһын туһунан иһитиннэриини оҥорбут Ойуурга сыһыаннаһыы департаменын салайааччы Вячеслав Попов Варвара Михайловна ойуур хаһаайыстыбатын инженердэрин анал үрдүк үөрэҕин бүтэриэҕиттэн, отут тохсус сылын үтүө суобастаахтык үлэлии сылдьарын бэлиэтээтэ. Кини салайар Хаҥаластааҕы лесничествота 2 мөл. 818 тыһ. гектар сиринэн тайаан сытар күөх тыаны көрөр-истэр, үлэ саҥа технологияларын олоххо киллэрэр, өрөспүүбүлэкэҕэ холобур буолар бастыҥ үлэлээҕин эттэ.
Үлэ Дьоруойун эҕэрдэлээн Бырабыыталыстыба Баһылыгын бастакы солбуйааччы – Тыа хаһаайыстыбатын уонна ас-үөл бэлиитикэтин миниистирэ Петр Алексеев, Хаҥалас улууһун баһылыга Гаврил Алексеев, Дьоруой дойдутун, Горнай улууһун, баһылыга Никита Андреев итиэннэ биир идэлээхтэрэ — «Рослесинфорг» ФСБТ Саха сиринээҕи салаатын салайааччы, РФ Ойуурун хаһаайыстыбатын үтүөлээх үлэһитэ Саргылана Аммосова, Амма лесничествотын лэсниичэйэ, норуот хаһаайыстыбатын үтүөлээх үлэһитэ Николай Артемьев тыл эттилэр.
Раиса Сибирякова, “Саха сирэ” хаһыат, edersaas.ru.
Үлэ Дьоруойа Варвара Устинова
Үөрүүлээх мунньахха саала толору
Ойуурбут харыстабыла эрэллээх илиигэ
Күннээҕи үлэ салҕанар
Хаартыскаҕа Андрей Сорокин (СИА) түһэриилэрэ.