Арктикатааҕы судаарыстыбаннай агротехнологическай университекка “Траектория карьеры” диэн өрөспүүбүлүкэтээҕи дьаарбаҥка үһүс төгүлүн ыытылынна.
СӨ Тыа хаһаайыстыбатын миниистирэ Александр Атласов бэлиэтээбитинэн, үөрэҕи бүтэрээччилэр тыа хаһаайыстыбатын тэрилтэлэригэр үлэнэн хааччыллалларыгар сыал-сорук туһаайыллан маннык тэрээһин ыытыллар. Бу туһунан тустаах министиэристибэ пресс-сулууспата иһитиннэрдэ.
Дьаарбаҥкаҕа тыа хаһаайыстыбатын тэрилтэлэрэ ханнык үлэ миэстэтэ баарын, үлэ туһунан сырдаттылар. Тэрилтэлэр 300 курдук үлэ миэстэтигэр эдэр дьону ыҥырдылар. Ол курдук, Амма, Үөһээ Бүлүү, Сунтаар, Өлүөхүмэ, Хаҥалас, Нерюнгри, Булуҥ оройуоннарыттан, “Дьокуускайдааҕы көтөрү иитэр фабрика”, “Туймаада” агрохолдинг, уо.д.а. кытыннылар.
Тэрээһин иитинэн маастар-кылаастар ыытылыннылар, үлэҕэ ыҥырааччылар презентациялара буолла. Эдэр дьон үлэ-хамнас туһунан сиһилии билистилэр, туох чэпчэтиилэр көрүллэллэрин, усулуобуйаны токкоолостулар, ыйытыыларыгар толору хоруйдары ыллылар. Бэлиэтэнэринэн барыта 350-тан тахса ыччат дьаарбаҥканы сэҥээрэн кытынна.