Уопсастыба

Үлэ былаан быһыытынан барар



Атырдьах ыйын 6 күнүгэр Сунтаар улууһун  баһылыга Анатолий Григорьев, тыа хаһаайыстыбатын управлениетын салайааччыта Иван Тихонов уонна улуустааҕы тутуу комплексын управлениетын инженера Виктор Ефремов буолан, Түбэй Дьаархан, Толоон уонна Хоро нэһилиэктэригэр сылдьан от үлэтин хаамыытын көрдүлэр.

edersaas.ru


Түбэй Дьаархаҥҥа «Арыылаах» ходуһатыгар Михаил Комин салайааччылаах хаһаайыстыба үлэтин кытта билистилэр. Алта киһилээх, толору механизированнай звено үлэлии-хамсыы сылдьар. Михаил Комин улуус баһылыгар кэпсээбитинэн былааннара 400 т., билиҥҥи тургунан 200 т. тахса от бэлэмнэммит. Салгыы 4 киһилээх мобильнай биригээдэ өрүс уҥуор “Мэлэкэҕэ” оттуу тахсар былааннаахтар.


Толоон нэһилиэгин баһылыга Андрей Павлов уонна тыа хаһаайыстыбатын бэтэрээнэ Габышев Борис Иннокентьевич буолан оттуур “Моҥоос” диэн ходуһаларыгар илдьэн от үлэтин көрдөрдүлэр. Үлэ күргүөмнээхтик бара турара харахха быраҕыллар. Бугул бөҕө туран, кээһиилээх оттор кэчигирээн, былаанын толорор кыахтааҕын иһитиннэрдэ.
Салгыы Хоро нэһилиэгэр тиийэн чааһынай хаһаайыстыбалар оттуур ходуһаларыгар үлэ үөһүгэр сылдьалларын көрдүлэр. Хоро нэһилиэгин баһылыга Валерий Ефимов оҕо саадын благоустройствота оҥоһуллан эрэрин көрдөрөн кэпсээтэ.
Улуус үрдүнэн от былаана 34100 т., бүгүҥҥү туругунан 42% туолбут.


«Сунтаар улууhа (оройуона)» МО дьаһалтатын пресс-сулууспата.

0
0

Санааҕын суруй