Кыайыы күнүгэр, САССР 100 сылыгар уонна Өрөспүүбүлүкэтээҕи 3 №-дээх килиниичэскэй балыыһа 90 сылыгар аналлаах «Диабет хонтуруолга ылыллар» аһымал аахсыйа поликлиникаҕа ыам ыйын 5 күнүгэр ыытылынна.
СӨ Доруобуйа харыстабылын министиэристибэтэ көҕүлээбит аһымал аахсыйатын чэрчитинэн поликлиникаҕа сыһыарыллыбыт уонна эндокринологка учуокка турар үлэ бэтэрээннэригэр хааҥҥа саахар таһымын бэрэбиэркэлиир дойдуга оҥоһуллубут глюкометрдары туттардылар.
СӨ доруобуйа харыстабылын миниистирин бастакы солбуйааччы Роман Савин иһитиннэрбитинэн, билигин Саха сиригэр араас саастаах, «диабет» ыарыылаах 24 788 киһи учуокка турар.
СӨ Доруобуйа харыстабылын министиэристибэтэ уонна «Сахафармация» АУо кинилэргэ анаан 3 000 глюкометры атыыластылар. Итинтэн бастакы уочаратынан 100 устууката, гериатриянан анаан дьарыктанар мэдиссиинискэй тэрилтэ быһыытынан, Өрөспүүбүлүкэтээҕи 3 №-дээх килиниичэскэй балыыһаҕа бэрилиннэ.
Саҥа прибордар уратыларынан аксессуардара -– дьураа-тиэһэ буолар. Дьураа-тиэһи ханнык баҕарар аптыакаттан булуохха сөп. Ону таһынан, саансыйалар усулуобуйаларыгар сыаналара валюта хамсааһыныттан тутулуга суоҕа уонна омук тэрилин солбуйарга биир бастакы ситиһиилээх хардыынан буолбута улахан суолталаах.
Саҥа мэдиссиинискэй прибордар баһыйар өрүттэрин туһунан «Сахафармация» АУо салайааччыта Степан Кусатов кэпсээтэ.
Эмтэнээччилэргэ соһуччу бэлэҕинэн аппарааты хайдах туһанар туһунан ыйыы-кэрдии сахалыы тылынан суруллубута уонна оҥорон таһаарааччы глюкометр хаатыгар чопчу Саха сиригэр анаммытын туһунан суруга буолар. «Барыта биһиги эмтэнээччилэрбитигэр табыгастаах буоларын туһугар!» – диэн аахсыйаны тэрийээччилэр этэллэр.
Өрөспүүбүлүкэтээҕи 3 №-дээх килиниичэскэй балыыһа кылаабынай бырааһа, мэдиссиинискэй наука доктора Ольга Татаринова бэтэрэннэргэ глюкометрдары босхо туһаналларыгар туттара туран, бэйэ доруобуйатыгар эппиэтинэстээхтик сыһыаннаһыы улахан суолталааҕын бэлиэтээтэ. Кини иһитиннэрбитинэн, диабет содулун сэрэтэргэ уонна үчүгэй хонтуруолу тэрийэргэ, олох хаачыстыбатын тупсарарга улахан оруол эмчиттэргэ эрэ буолбакка, эмтэнээччигэ эмиэ бэриллэр. Кылаабынай быраас саҥа аппарааттары көдьүүстээхтик туһаналларыгар көрдөстө. Ону таһынан инникитин ороскуоттуур матырыйааллар – тиэс-дьураалары балыыһа эмтиир эндокринолог эбэтэр эмтиир быраас электроннай эрэсиэбинэн биэриэҕин туһунан эттэ.
Эмтэнээччилэр ааттарыттан үлэ бэтэрээнэ Людмила Высоцкая эмчиттэргэ уонна Доруобуйа харыстабылын министиэристибэтигэр кыһамньыларын иһин махтанна. Сотору дойдуга оҥоһуллубут глюкометры туһаммыт уопутун туһунан хайаан да кэпсииргэ эрэннэрдэ.
«Саха сирэ», edersaas.ru анаан Яна БАЙГОЖАЕВА