Муус устар үлэ харыстабылын ыйынан биллэрилиннэ. Бу тэрээһин производствоҕа үлэлии сылдьан эчэйиини таһаарбат, үлэһит доруобуйатын, олоҕун харыстыыр, үлэ усулуобуйатын тупсарар сыаллаах ыытыллар. Бу туһунан СӨ бырабыыталыстыбатын муус устар 5 күнүнээҕи 366-р №-дээх дьаһала тахсыбыта.
Быйыл үлэ харыстабылын ыйа эдэр үлэһиттэргэ ананар. Ол эбэтэр кинилэри сэрэтэр, сырдатар сыаллаах, бары улуустарга, тэрилтэлэргэ ыытыллар. Ол курдук, тэрилтэлэргэ үлэ усулуобуйатын билиһиннэрэр аһаҕас аан күннэрэ, үлэ харыстабылын күннэрэ ыытыллыахтара. Кэлэктиип дуогабардарын, үлэ харыстабылын сөбүлэһиилэрин бары пууннара төһө толоруллалларын кэтээн көрүөхтэрэ, кыһалҕалары быһаарарга үлэ барыаҕа.
Үлэ, социальнай сайдыы министиэристибэтэ бары биэдэмэстибэлэри, улуустар, нэһилиэктэр дьаһалталарын, идэлээх сойуустары, үлэни биэрээччилэри уонна үлэһиттэри бу тэрээһиннэргэ көхтөөх кыттыыны ылалларыгар ыҥырар.
Туох эмит ыйытыы үөскээтэҕинэ, министиэристибэҕэ 42-01-57 нүөмэргэ, Үлэ усулуобуйатын кэтээн көрөр өрөспүүбүлүкэтээҕи информационнай-аналитическай кииҥҥэ 21-50-04 нүөмэргэ эрийэргитигэр көрдөһөллөр.
Ангелина Васильева, “Саха сирэ” хаһыат, edersaas.ru