Ил Дархан Егор Борисов бэҕэһээ атырдьах ыйын 4 күнүгэр «АЛРОСА» аахсыйалаах хампаанньа «Мир» руднигар буолбут саахалга олохторун толук уурбут горняктар аймахтарыгар, чугас дьонноругар дириҥ кутурҕанын тиэрдэн туран, атырдьах ыйын 29 күнүн Кутурҕан күнүнэн биллэрэр туһунан ыйаахха илии баттаабыта.
Онон, бүгүн өрөспүүбүлүкэ үрдүнэн Россия Федерациятын уонна Саха Өрөспүүбүлүкэтин судаарыстыбаннай былаахтарыгар хара лиэнтэ баайылынна, дьону көччүтэр дьаһаллар, оонньуулар, кэнсиэртэр бобулуннулар. Дьокуускайга Аммосов уул. 8 №—гэр баар «АЛРОСА» хампаанньа бэрэстэбиитэлистибэтин дьаһалтатын дьиэтин иннигэр «Мир» рудникка сүппүт аҕыс киһи сырдык кэриэһигэр Кутурҕан эркинэ туруорулунна.
Бырабыыталыстыба бэрэссэдээтэлэ Евгений Чекин, бастакы вице-премьердэр Алексей Колодезников, Петр Алексеев, вице-премьердэр Игорь Никифоров, Михаил Гуляев, уопсастыбаннас бэрэстэбиитэллэрэ, куорат олохтоохторо уонна ыалдьыттара былаҕайга былдьаммыт дьону кэриэстээннэр, манна саҥата суох хоҥкуйан турдулар, тыыннаах сибэккилэри уурдулар, чүмэчи уматтылар. Горняктары кэриэстиир дьаһаллар Москваҕа уонна Санкт-Петербурга баар өрөспүүбүлүкэ бастайааннай бэрэстэбиитэлистибэлэригэр эмиэ аастылар.
Раиса СИБИРЯКОВА, “Саха сирэ” хаһыат, edersaas.ru
Хаартыскаҕа Андрей Сорокин (СИА) түһэриилэрэ