Саха сирин суруйааччыларын сойууһа быйыл “Өлбөт үйэлээх полк” акцияҕа кыттан, фронтовик-суруйааччылар мэтириэттэрин тутан хаамта.
Саха сирин суруйааччыларын сойууһун бэрэссэдээтэлэ Наталья Харлампьева иһитиннэрбитинэн, суруйааччылар бу аахсыйаҕа бастакытын кытыннылар.
— Аҕа дойду сэриитэ хас биирдии саха ыалыгар сыһыаннаах. Улуу Кыайыы хас биирдии киһиэхэ ураты суолталаах. Ол тэҥэ биһиэхэ, Саха сирин суруйааччыларын сойууһугар, суолтата улахан. Суруйааччылартан сүүрбэттэн тахса киһи Аҕа дойду сэриитигэр кыттан, саа-саадах тутан дойдуларын көмүскэспиттэрэ. Бу аахсыйаҕа кыттар туһунан өссө биһиги норуодунай суруйааччыбыт, прозаик, драматург Василий Васильев-Харысхал этии киллэрбитэ. Дьаҥ-дьаһах туран ити этиитин быйыл олоххо киллэрэн, «Өлбөт үйэлээх полк» кэккэтигэр фронтовик-суруйааччыларбыт мэтириэттэрин тутан хаамтыбыт, — диэн этэр Наталья Ивановна.
Санатан эттэххэ, Саха сириттэн сүүрбэ суруйааччы Аҕа дойду сэриитигэр кыттыбыта. Сэрии кэнниттэн кэлэн баран үйэлэргэ умнуллубат айымньылары норуоттарыгар айан-тутан, суруйан хаалларбыттара.
Иннокентий Иванович Артамонов, Алексей Спиридонович Бродников, Софрон Петрович Данилов, Архип Георгиевич Кудрин, Макар Иванович Кузьмин–Макар Хара, Серафим Романович Кулачиков–Эллэй, Гавриил Иванович Макаров–Дьуон Дьаҥылы, Семен Осипович Никифоров, Исай Прокопьевич Никифоров, Степан Афанасьевич Саввин–Күн Дьирибинэ, Никифор Кирикович Седалищев–Дьүөгэ Ааныстыырап, Тимофей Егорович Сметанин, Николай Дмитриевич Слепцов–Туобулаахап, Василий Сергеевич Соловьев–Болот Боотур, Степан Иванович Тимофеев, Петр Николаевич Тобуроков, Юрий Иванович Шамшурин, Иннокентий Илларионович Эртюков, Георгий Саввич Сыромятников, Николай Иванович Степанов ааттара, айымньылара умнуллубат.
Аграфена КУЗЬМИНА