Хааччахтааһын кэмигэр икки сыл тохтуу сылдьан баран, ыам ыйын 9 күнүгэр Дьокуускайга ыытыллыбыт “Өлбөт үйэлээх полк” патриотическай аахсыйаҕа 47 тыһыынча кэриҥэ киһи кытынна.
Саха сиригэр сэрии ыар тыына хаарыйбатах ыала диэн суох. Онон дьон Аҕа дойдуну көмүскүүр сэрии кыттыылаахтарын уонна тыылга үлэлээн, Кыайыыны уһансыбыт эһэлэрин-эбэлэрин мэтириэттэрин киэн тутта күөрэччи тутан, сэлэлии хаамыстылар.
Кинилэр ортолоругар Сталинграды көмүскээбит буойун, пулеметчик, олоҥхоһут, тойуксут Андрей Титович Титаров сиэнэ – Ил Дархан Айсен Николаев эһэтин мэтириэтин тутан, эмиэ хаамыста.
Ону тэҥэ, аан бастаан фронтовик-суруйааччылар мэтириэттэрин күөрэччи тутан, Саха сирин Суруйааччыларын сойууһун чилиэннэрэ бу патриотическай аахсыйаҕа кыттыстылар.
“Өлбөт үйэлээх полк” холуонналара Кыайыы болуоссатыттан Дзержинскэй уулуссатыгар диэри субустулар. Уулуссалар кытыыларынан көрөөччүлэр кэчигирээбиттэр. Чахчы, быйыл элбэх киһи кытынна. Бу аахсыйаҕа ким баҕарар, сэрии, тыыл бэтэрээннэрин, сэрии кэмин оҕолорун, бойобуой дьайыылар кыттыылаахтарын мэтириэттэрин тутан, кыттыан сөп.
Санатар буоллахха, “Өлбөт үйэлээх полк” аан бастаан маннык көрүҥүнэн 2012 сыллаахха Томскайга ыытыллыбыта. Кыайыы 75 сылыгар пандемияттан сылтаан, “Өлбөт үйэлээх полк” аан бастаан онлайн-көрүҥүнэн ыытыллыбыта, онно 2,4 мөлүйүөн киһи кыттыбыта. Оттон 25 мөлүйүөн киһи быһа эпиирин киирэн көрбүтэ. 2021 сылга 5 мөлүйүөн киһи кыттыбыта.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru