Соторутааҕыта Өймөкөөн нэһилиэгин олохтооҕо Наталья Винокурова ууга түһэн, күн сириттэн мата сыыста.
edersaas.ru
— Нэһилиэгим дьаһалтатыгар киирэн, миигин соторутааҕыта өлөр өлүүттэн быыһаабыт Егор Посельскайга махтанан, баһылыкпар “Ууга түспүтү быыһааһын иһин” диэн суолталаах наҕараадаҕа түһэрэригэр анаан кэлэн кэпсэтээри олоробун. Бу түбэлтэ нэһилиэкпитигэр уу саамай кэлэн турдаҕына, атырдьах ыйын 4 күнүгэр буолбута. Мин Үүт Уурбуттан Биэрэк Үрдүгэр баран иһэр кыргыттары кытта аргыстаһаары, кэннилэриттэн эккирэппитим. Ситэн кэлэн: “Күүтүҥ!” – диэн хаһыытаабытым. Кыргыттарым мас ууммуттарын ылаары, халтарыйан ууга түспүтүм. Сүүрүгэ түргэнэ сүрдээх этэ. Хата, чугас талахха кэлэн иҥнэн, онтон тардыһан сытан: “Быыһааҥ!” – диэн хаһытаа да хаһыытаа буолбутум. Дьолго, кыргыттар айманалларын, мин хаһыыбын истэн, оруобуна Биэрэк Үрдүгэр айаннаан иһэр Егор Посельскай массыынатыттан ыстанан тахсаат, миэхэ харбаан кэлбитэ. 64 саастаах киһи тыыннаах хаалар быабар Егор чугас баар буолан, күн сырдыгыттан маппатым. Бу маннык дьон хайаан да наҕарааданан бэлиэтэниэхтээхтэр дии саныыбын. Тыыннааҕым тухары Егорга махтана сылдьыам? — диэн кэпсиир Наталья Винокурова.
Мин Егор Посельскайтан төлөпүөнүнэн бэйэтиттэн бу түбэлтэ туһунан ыйыталастым. Онуоха кини маннык кэпсээтэ:
— Улахан уу саамай кэлэн турар кэмэ этэ. Миигин Биэрэккэ түһэрэн биэр диэн көрдөспүттэригэр айаннаан испитим. Ол иһэн көрдөхпүнэ, уу сууйбут суолун анараа өттүгэр сүүрүктээх ууга талах быыһыгар мастан тутуһан, киһи быыһана сатаан, хаһыытыы турара. Суолтан халтарыйан түһэн, сүүрүккэ оҕустаран баран иһэн, мастан тутуһан иҥнибит. Мин харбаан тиийиибэр, сэниэтэ эстэн хаалбыт этэ. 20-чэ мүн. турбут быһыылааҕа. Ити трассаттан 40-ча миэтэрэ. Мин быалаах тиийэн, тииккэ быаны баайа охсоот, онтон тутуһан киниэхэ тиийбитим. Кэннибиттэн уолаттар көмөҕө кэлбиттэрэ. Балыыһаҕа илдьээри гыммыппытын: “Дьиэбэр барыахпын баҕарабын”, — диэбититтэн илдьэн биэрбиппит. Наталья тыыннаах хаалыах быатыгар, биһиги түбэһэ айаннаан испит эбиппит…
Нэһилиэк баһылыга Павел Васильев бэлиэтииринэн, Өймөкөөҥҥө халаан иэдээнин аймалҕанын күнүгэр өссө биир кутталлаах түбэлтэ тахса сыспыт.
— Өймөкөөн дьоно ис испититтэн өрүү бэйэ-бэйэбитигэр көмөлөһөр айылгылаах дьоммут. Егор Посельскай бааһырынай чаас үлэһитин быһыытынан тустаах идэтинэн да быыһааччы буолан, толкуйдуу барбакка, көмөҕө ыстаммыт. Итиннэ кыратык да хойутаабыта буоллар, кырдьаҕас киһи сэниэтэ эстэн, талаҕын ыһыктан кэбиһиэ этэ. Онон нэһилиэк дьаһалтата Егор Посельскайы “Ууга түспүт дьону быыһааһын иһин” диэн мэтээлгэ түһэрээри гынабыт. Ыксаллаах быһыыга-майгыга биир дойдулааҕар илиитин утары ууммута хайаан да болҕомтоҕо ылыллыан наада, — диэн санаатын үллэһиннэ олохтоох дьаһалта баһылыга.
Кырдьык, быйыл сайын халаан буолбут кэмигэр Өймөкөөҥҥө алдьархай тахса сыыспыт. Егор Посельскай таба көрөн, ууга түһэн эрэр киһини өрүһүйэн, Наталья Винокурова билигин биир дойдулаахтарын кытта күлэ-үөрэ сылдьар.
Елена ПОТОЦКАЯ, «Саха сирэ» хаһыат, edersaas.ru