Коронавирус турбут кэмигэр үгүс киһи дьиэҕэ хааччахтанан олордо. Сорохтор бу кэми туһалаахтык атааран, талааннара арыллан, биисинэс да тэриннилэр.
Оттон бүгүн кэпсэппит киһим, Ларьяна Алексеева бу уустук кэм устата сүүс туорду оҥорон атыылаабытын туһунан үөрэ-көтө кэпсээтэ.
ПИОН, ХРИЗАНТЕМА, РОМАШКА…
— Мин күнүм сарсыарда алта чаастан саҕаланар. Кыра уолум эрэсииминэн, биһиги дьиэ кэргэн бары эрдэ уһуктабыт. Ол иһин күнү-дьылы, бириэмэни сатаан аттарынар туһуттан, күннээҕи үлэбин барытын сөпкө былаанныырга дьулуһабын.
Мин туорт оҥоруутунан уруккуттан дьарыктанабын. Ол эрээри, бу дьиэҕэ хааччахтаныы кэмин холкутук ылынан, урукку өттүгэр ылсыбатах саҥа саҕалааһыннарбын оҥордум диэн үөрэбин. Ол курдук, арыыта суох кириэмтэн туорт сибэккилэрин оҥорорго үөрэнним. Бу олус уустук эрээри, умсугутуулаах үлэ. Саас Дьахтар күнүн көрсө кэргэним планетарнай миксер бэлэхтээбитэ, ити тэрил мин туорт оҥорор уустук үлэбин биллэ чэпчэттэ. Онон кириэмтэн сибэккилэри сарсыардааҥҥы остуолум «хонуутугар тылыннарабын». Пион, хризантема, ромашка сибэккилэр мин туортарбар самаан сайыны санаталлар.
ХААЧЧАХТАНЫЫ КУРДУК ЫЛЫММАТАҔЫМ
— Мин билигин кыра оҕобор олоробун. Билигин Дьокуускайга туорт оҥоруутунан дьарыктанар кэрэ аҥаар элбэх. Ол эрээри атыылаһааччы хаһан баҕарар кимтэн ыларын, кимиэхэ сакаастыырын бэйэтэ быһаарар. Онон биһиги өрүү инники күөҥҥэ буолар туһуттан, хаачыстыба туһугар үлэлиибит. Хас биирдии кэрэ аҥаарга оҕо көрөн олорор кэмэ бэйэ кыаҕын билиниигэ тургутук буолар дии саныыбын. Бу пандемия кэмигэр мин сүүс туорду оҥордум, саамай хамаҕатык атыыга мүөттээх туорт барар. Билигин дьон дьиэҕэ аҕалан биэрии өҥөтүн хото туһанар, урут омук киинэлэригэр көрөрбүт курдук, дьиэҕэ аһылык сакаастаан аһыыр буоллулар диэххэ сөп. Уонтан тахса сыллааҕыта аан бастаан пицца сакааһа рекламаламмытыгар, «аата, ким сакаастыыр үһү» дии саныырбыт. Билигин социальнай ситим нөҥүө сакаастаатахха, бэрэскититтэн салаатыгар диэри дьиэҕэ аҕалан биэрэллэр.
Ульяна Захарова, «Саха сирэ» хаһыат, edersaas.ru