«Спартак» футбол кулуубун чилиэнэ Джордан Ларссон Дьокуускайтан сылдьар Дима Березовскай протезтанарыгар көмөлөһүөх буолла.
Ларссон бу туһунан видео устан социальнай ситимҥэ таһаарда:
— Дорооболоруҥ! Мин аатын Джордан Ларссон диэн. «Спартак» өрүү дьоҥҥо көмөлөһөр. Ол иһин мин Дьокуускайтан сылдьар Димаҕа көмөлөһүөхпүн баҕарабын. Кини «Спартак — оҕолорго» пуонда чилиэнэ буолар, онон мин кини протеһын харчытын төлүөҕүм. Дима, эйиэхэ доруобуйаны баҕарабын, эпэрээссийэ этэҥҥэ ааһыаҕа диэн эрэнэбин. Стадиоҥҥа кэлэргин күүтэбин! Барытын бииргэ кыайыахпыт!
Маннык көмөнү «Спартак» кулуубун футболистара куруук оҥороллор. Сэтинньи саҕаланыыта хамаанда хапытаана Георгий Джикия Новочеркасска олорор Павел диэн оҕоҕо көмөлөспүтэ.
Дима Березовскай 2013 сыллаахха 9 саастааҕар Дьокуускайга тутуу буола турар сиригэр уокка оҕустарбыта. Кини клиническэй өлүүнү ааспыта, мэйиитин таарыйтарбыта, бу түмүгэр илиитин быспыттара.
edersaas.ru
Хаартыска — РИА.