«Дьокуускайдааҕы килиэп комбината» аһаҕас аахсыйалаах уопсастыба Арассыыйа наукаларын академиятын Сибиирдээҕи салаатын Криолитозона биологическай проблемаларыгар институтын кытары бииргэ үлэлээн, лабыкталаах килиэби астааһыны саҕалаата.
edersaas.ru
Килиэп кэмбинээтэ бу бородууксуйатын өссө ааспыт саас «Килиэп – барыга баһылык» диэн өрөспүүбүлүкэтээҕи быыстапкаҕа билиһиннэрбитэ.
– Биһиги саҥа ассортимеммытын оруостаах сэлиэһинэйгэ мэлиллибит айылҕа лабыктатын уонна сэттэ хонукка тиийэ харайылларыгар көмөлөһөр туһалаах эттиктэри эбэммит астыыбыт, —— диир кэмбинээт менеджерэ Елена Марк. – Лабыкталаах килиэби маҕаһыыннарга атыыга таһаардыбыт.
Санатан эттэххэ, лабыкта А уонна С битэмииннэринэн, тимир, барий, алтан, хром, титан, марганец, никель, дьуот о.д.а. курдук макро-, микроэлимиэннэринэн баай. Ис-үөл уонна тыынар уорган ыарыытыгар, иммунитет мөлтөөһүнүгэр, ньиэрбэни уоскутарга, организмтан токсиннары таһаарарга туһаныллар. Ол иһин лабыкталаах килиэп спортсменнарга, сааһырбыттарга итиэннэ ыарахан үлэҕэ сылдьар дьоҥҥо туһалаах буолуоҕа.
Раиса Сибирякова, «Саха сирэ», edersaas.ru