Хамсык анаалыһын оҥорор лабораториялар өрөбүл күннэргэ эмиэ үлэлиэхтэрэ диэн бүгүҥҥү брифинг кэмигэр Ольга Балабкина иһитиннэрдэ.
Кэлиҥҥи суукка устата өрөспүүбүлүкэ лабораторияларыгар 5362 анаалыс оҥоһуллубут. Быйыл сааскыга, сайыҥҥыга тэҥнээтэххэ, ити хас даҕаны бүк элбэх. Ол да үрдүнэн, ыарыһахтар анаалыс түмүгэ хойутуур дииллэр.
“Лабораториялар анаалыс оҥоһуллуутун бириэмэтин салгыы кылгатар туһугар үлэлииллэр. Анаалыһы түргэтэтэр үлэҕэ ситиһиилэр бааллар. Ол эрээри, сороҕор араас төрүөтүнэн, 3-5 күн иһигэр оҥоһулла охсубат түгэннэрэ эмиэ бааллар. Бары түгэни биирдиилээн көрүллэр уонна көннөрөн бэриллэр.
Бүгүн Айсен Сергеевич Николаев салайааччылаах суһал ыстаап мунньаҕын быһаарыытынан, өрөспүүбүлүкэ бары лабораториялара, ол иһигэр өрөспүүбүлүкэ былааһын бас билиитигэр киирбэт ХИФУ лабораторията эмиэ, өрөбүл күннэргэ үлэлииллэригэр ыйыы бэрилиннэ”, — диэтэ Ольга Балабкина.
Людмила ПОПОВА, “Саха сирэ” хаһыат, edersaas.ru
Хаартыска: Panoramapro.ru