«МегаФон» ПАУо Амма – Болугур хайысхатынан мобильнай интэриниэти күүһүрдэн, олохтоохтор түргэн интэриниэтинэн туһанар кыахтаннылар. Эһиил суотабай оператор өрөспүүбүлүкэҕэ сибээһи сайыннарыыга үлэтин өссө даҕаны күүһүрдэр, үлэтин ыырын кэҥэтэр былааннаах. Бу туһунан «Мегафон» Уһук Илиннээҕи салаатын салайааччыта Андрей Левыкин суруналыыстары кытары көрсүһүү кэмигэр иһитиннэрдэ.
edersaas.ru
Бүгүҥҥү туругунан өрөспүүбүлүкэҕэ Россия үс улахан мобильнай оператора үлэлиир. Хомойуох иһин, сорох түгэҥҥэ мобильнай интэриниэт, оннооҕор сибээс хаачыстыбата доҕолоҥноон ылар. Арыт электричество уота араҕыстаҕына, дьоҕус нэһилиэнньэлээх пууннарга суотабайдара үлэлээбэт буолан хаалар. Бу барыта оборудованиеттан, станцияттан быһаччы тутулуктааҕын суотабай сибээс хампаанньаларын үлэһиттэрэ этэллэр.
Андрей Левыкин этэринэн, «Мегафон» LTE Advanced ( 4.5G) стандартынан Россия 37 эрэгийиэнэ, ол иһигэр Саха сирин олохтоохторо туһаналлар. Оттон 4G (LTE) түргэн сырыылаах мобильнай интэриниэтинэн нэһилиэнньэ 65%-на туһанар. Бу эрэгийиэҥҥэ телеком сайдан иһэрин бэлиэтиир. Өрөспүүбүлүкэҕэ LTE уонна LTE-Advanced ситимнэр сайдан эрэллэрин таһынан, кыра нэһилиэктэр 2G/3G ситимҥэ холбонон эрэллэр.
Былырыын Илиҥҥи экономическэй форум кэмигэр СӨ бырабыыталыстыбата Россия биир улахан мобильнай оператора – «МегаФон» ПАУо-ны кытары сөбүлэһии түһэрсибитэ. Владивостокка түһэрсиллибит сөбүлэһиигэ олоҕуран, «Мегафон» хампаанньа сибээс саҥа ситимнэрин, станцияларын тутуоҕа уонна түргэн сырыылаах мобильнай интэриниэтинэн олохтоохтору хааччыйарга бары күүһүн ууруоҕа.
Анивера АКИМОВА, edersaas.ru