Өлөөн бары нэһилиэктэригэр Улуу Кыайыы күнэ үрдүк таһымнаахтык буолан ааспыт.
Бу туһунан биһиэхэ «Кэнчээри» уһуйаан сэбиэдиссэйэ Алла Петрова иһитиннэрдэ:
— Дьэлиҥдэ олохтоохторо өрүү болҕомтону тардар, киһини кэрэхсэтэр тэрээһини толкуйдууллар. Быйыл олохтоох дьаһалта аатыттан ытык кырдьаҕастарын дьиэлэригэр сылдьан эҕэрдэлээбиттэр. Харыйалаахтар эмиэ кырдьаҕастарын чиэстээбиттэр уонна «Ким да умнуллубат, туох да умнуллубат!» өйдөбүнньүккэ тыыннаах сибэкки дьөрбөтүн уурбуттар. Ээйиккэ аҕам саастаахтарын ыҥыран күндүлээбиттэр, бэлэхтэри туттарбыттар. Онон дьон-сэргэ ханна да улаханнык сэргэхсийэн, үөрэн-көтөн олорор.
Өлөөн улууһун киинигэр «Өлбөт үйэлээх полк» аахсыйаҕа дьон-сэргэ турунан таҕыста. Хоту дойду хоһуун дьонун тымныы тыал да, хаар да тохтоппото. Салгыы тэрээһиннэр болҕомтону тартылар, дьон-сэргэ көхтөөхтүк кытынна. Ол курдук, 100, 200, 500 м. эстэпиэтэҕэ тэрилтэнэн да, биирдиилээн да дьон саастарынан бөлөххө арахсан күрэхтэстилэр. Быһа холуйан, отучча киһи сүүрдэ, илин-кэлин түсүһүү, эрбии тииһин курдук эгил-тэгил киирсии буолла. Кыраайы үөрэтэр мусуойга үүнэр көлүөнэ билиитин-көрүүтүн хаҥатар сыаллаах-соруктаах Кыайыы күнүгэр аналлаах бэртээхэй квест-оонньуу ыытылынна. Улуу Кыайыы өрөгөйдөөх күнүн көрсө Өлөөн оҕо-ыччат успуорка оскуолатын филиалын кытта Харыйалаахха «Морской бой», «Солдатская пилотка» байыаннай-спортивнай оонньуулар ураты сэргэхтик ыытыллыбыттарын дьон үөрэн кэпсиир. Маны сэргэ, сыал ытыытыгар маастар-кылаас, мини-футболга күрэхтэһии болҕомтону тардыбыт. «Звезда», «Победа», «Вечный огонь», «Красные береты» оскуола оҕолорун хамаандалара күрэхтэспиттэр. «Кыайыы салюта» викторинаҕа ахсыс, тохсус, онус, уон биирис кылаас оҕолоро төрөппүттэрин кытары кыттыылара нэһилиэккэ улахан сэргэхсийиини таһаарбыт. Маннык күрэс кэлэр да өртүгэр ыытылла турарыгар баҕаралларын биллэрбиттэр. Онон Өлөөн улууһугар бу күннэргэ улахан сэргэхсийии буолла, Улуу Кыайыы күнэ үрдүк таһымнаахтык ыытылынна.
Хаартыскалар А.Петрова тиксэриилэрэ