Быйыл сайын Өлөөҥҥө табалары хайдах сайылаппыттарын, хайдах сайын ааспытын туһунан “Өлөөн” МУП зоотехнига, оройуон дьокутааттарын мунньаҕын (Сугулаанын) бэрэссэдээтэлин солбуйааччы, өрүү сэргэх сонуннаах Марина Николаева биһиэхэ маннык кэпсээтэ:
— Өлөөҥҥө ыстаадаттан атырдьах ыйын 31 күнүгэр кэлбиппит. Биир өттүнэн ыллахха, үчүгэй сайын диэххэ сөп. Ол эрээри сайын диэни көрбөтүбүт, күннээх күнэ аҕыйах этэ. Дьиҥэ, сөрүүҥҥэ таба уойуон сөп этэ даҕаны, сииктээҕэ эмиэ бэрдэ суох. Хата, атахсыт эҥин курдук ыарыылар буулаабатылар диэн үөрэбит. Сир-дойду уу буолан, көһөрбүтүгэр эҥин сүрдээх моһуоктары көрсө сырыттыбыт. Оройуон үрдүнэн ыллахха ыстаадаҕа 43 оҕо сайылаата. Табаһыттар санаалара бөҕөх. Бэтэринээрдэр тахсан ыстаадаларга үлэлээтилэр. Табабыт уопсай ахсаана билиҥҥитэ этэҥҥэ. Ол оннугар адьырҕа кыыл биир ыстаадабытын саас моһуоктаабыта. Онуоха эбии туундара өттүгэр сиэгэн элбээн, бородууктабытын аймыы сырытта. Оттон Дьэлиҥдэ диэки табаһыттар ардах диэни билбэтэхтэр. Онон биир оройуон иһигэр күн-дьыл туруга араас.
Бэлэмнээтэ Женни Стрюкова
СИА хаартыската.