Маны аах Уопсастыба

Өлөөҥҥө субуотунньук буолла

Өлөөҥҥө субуотунньукка дьон-сэргэ олус көхтөөхтүк кыттыбыт.  

Биһиэхэ итинник үөрүүлээх сонуну «Кэнчээри» оҕо уһуйаанын сэбиэдиссэйэ Алла Петрова иһитиннэрдэ.

 

Табаһыттар болуоссаттарыгар, пааматынньыктарга, уулуссаларга «В здоровом теле здоровый дух» өрөспүүбүлүкэтээҕи уонна «Күөх саас» аахсыйалар чэрчилэринэн тэрилтэлэр кэлэктииптэрэ, нэһилиэк олохтоохторо ох курдук оҥостон, турунан тахсан хаары ыраастаабыттар, нэһилиэктэрин иһин өрө тардыбыттар.

Сирэйдиин-харахтыын сырдаабыт, үөрэн мичилийбит, сүргэлэрэ улаханнык көтөҕүллүбүт дьон-сэргэ нэһилиэктэрин иһин бэрт түргэнник өрө тардан, тупсаҕай эйгэни тэрийэн, аҕам саастаахтар махталларын ылбыттар.

Олохтоохтор дьоммут-сэргэбит сааһы, кэрэни аҕаллылар диэн үөрүүлэрэ муҥура суох. Оттон субуотунньук кыттыылаахтара сибиэһэй салгынынан дуоһуйа тыынан, сөптөөхтүк хамсанан күүс-уох, сэниэ киллэринэн, улаханнык сэргэхсийбиттэр.

 

Аҕам саастаахтар алгыстарын ылбыт үлэһит дьон кэнчээри ыччакка: «Төрөөбүт дойдугутун, айылҕаҕытын таптааҥ, харыстааҥ. Оччоҕуна айылҕабыт барахсан биһигини бука барыбытын, чугас дьоммутун-сэргэбитин араҥаччылыа», — диэн ис сүрэхтэриттэн үөрэн, киэн туттан эппиттэр.

 

0
0