Саха сиригэр норуот маастарын күнэ бэҕэһээ ханна да өрө көтөҕүллүүлээхтик бэлиэтэннэ.
Дьон-сэргэ долгуйа күүппүт тэрээһинэ быйыл Саха АССР 100 уонна Арассыыйа норуоттарын култуураларын үйэлээх баайын үйэтитии сылларыгар ананна. Үөрүү, долгуйуу хас эмэ бүк үрдээтэ. Өрөспүүбүлүкэ киин куоратыгар, Дьокуускайга, сэлэлээн хаамыыга тыһыынчаттан тахса киһи кыттыбыт. Тыа сирдэрэ маннык үөрүүлээх тэрээһинтэн туора турбатылар. Өлөөнтөн үөрүүлээх сонуннарын үллэһиннилэр.
—Бу үрдүк үөрүүлээх дьоро күҥҥэ Дьэлиҥдэ, Кирбэй, Өлөөн олохтоохторо эрдэттэн бэлэмнэнэн, ох курдук оҥостон, кустук курдук куоһанан, үөрэн-көтөн туран кытыннылар. Эбэҥки норуота таба тириититтэн тигиллибит оһуордаах мааны таҥастарын кэттилэр, үҥкүүлээн тэйдилэр, эҕэрдэ эгэлгэтэ этилиннэ. Дьоһуннук туттан кэккэлээн хаамсыыны дьон-сэргэ наһаа кэрэхсээтэ. Сэргээтилэр, сөхтүлэр-махтайдылар, барҕа махтал тылларын тиэртилэр, — диэн иһитиннэрдэ Өлөөнтөн «Кэнчээри» уһуйаан сэбиэдиссэйэ Алла Петрова. Маннык тэрээһин кэнчээри ыччат өбүгэтин ытыктыы, устуоруйаны билэ-көрө улаатарыгар, өйүгэр-сүрэҕэр иҥэрэн илдьэ сылдьарын сэргэ, норуот үтүө үгэһэ умнуллубакка үйэттэн үйэҕэ бэриллэн иһэригэр төһүү буоларын бэлиэтээтэ.
Хаартыскалар, видео А.Петрова тиксэриилэрэ