Өлөөҥҥө хаарбахтан саҥаҕа көһөрүү бырагырааматынан үс дьиэ тутуллан үлэҕэ киирдэ.
«Олорор дьиэ уонна куорат эйгэтэ» национальнай бырайыак иитинэн, хаарбахтан саҥаҕа көһөрүү бырагырааматынан, саҥа дьиэлэр күлүүстэрин 38 ыал тутта. Онон Дьэлиҥдэ, Харыйалаах олохтоохторугар сэргэх, үөрүүлээх күннэр үүннүлэр.
«Бырагыраама иитинэн, Арктикаҕа уон сылга аан бастаан саҥа дьиэлэр тутуллаллар. Арктика биэс оройуонугар элбэх кыбартыыралаах 11 дьиэ үлэҕэ киирдэ. Сыл түмүктэниэр диэри өссө Үөһээ Халымаҕа уонна Эдьигээҥҥэ икки дьиэ киириэ. Бу барыта 294 саҥа кыбартыыра«, — диэн Ил Дархан Айсен Николаев бэлиэтиир.
Харыйалаахха 16 ыал саҥа дьиэлэннэ. СӨ Бырабыыталыстыбатын бэрэссэдээтэлин бастакы солбуйааччы Кирилл Бычков олохтоохтору өр кэтэспит ыра санаалара туолбутунан эҕэрдэлээтэ.
«Хаарбах дьиэттэн саҥаҕа көһөрүү бырагырааматынан, Арассыыйа эрэгийиэннэрин ортотугар манна саамай улахан, далааһыннаах үлэ ыытыллар. Ол чэрчитинэн, Өлөөҥҥө элбэх кыбартыыралаах хаарбах туруктаах 95 дьиэттэн 1273 киһи көһүөхтээх«, — диир кини.
Манна эбэн эттэххэ, Дьэлиҥдэҕэ — 6, Өлөөҥҥө 16 ыал саҥа дьиэ хаһаайыттарынан буоллулар. Кыбартыыралар истэрэ оҥоһуллубут, уунан, уотунан, сылааһынан хааччыйыыны учуоттуур тэриллэр туруоруллубуттар.
Бырагырааманан Арктикаҕа уопсайа элбэх кыбартыыралаах хаарбах туруктаах 496 дьиэттэн аҕыс тыһыынчаттан тахса киһи көһөрүллүөҕэ диэн этиллэр.
СӨ Ил Дархан уонна Бырабыыталыстыба пресс-сулууспатын суруйуутуттан тылбаас.
Хаартыска: тустаах саайтан ылылынна
+1
+1
+1
+1
+1
+1
+1