Кэлиҥҥи кэмҥэ кэлии табаар оннугар бэйэ бородууксуйатын оҥорон таһаарыы Саха сиригэр олохтоохтук сайдыбытын бэлиэтиэххэ сөп.
Холобура, ыраах хоту Өлөөн улууһугар Никан Николаев салайар «Өлөөн-ТОРГ» тэрилтэтин оҥорон таһаарар бородууксуйатыттан киһи сөҕөр.
— Ыам ыйыгар үөн-көйүүр тиллэ илигинэ көрөн-истэн, салгыҥҥа таба этин уонна тугунок хатарабыт.
Икки күн иһигэр бородууксуйа бэлэм буолар. Туох да сыаналаах тэрил онно наадата суох – Ийэ айылҕа ыраас салгына эти уонна балыгы сииргэ бэлэм гына оҥорор.
Сир аһын бородууксуйатын оҥорон таһаарыынан эмиэ дьарыктанабыт. Ол курдук, сугуну уонна күөх луугу Өлөөн олохтоохторугар сакаастыыбыт.
Ээйиктэн уонна Дьэлиҥдэттэн моруоска атыылаһабыт. Бородууксуйабытын астаан, барыанньалаан баран, атыыласпыт сыанабытыгар атыылыыбыт.
Ол курдук, эппитин киилэтин 250 солкуобайга атыылаһабыт уонна ол онтон оҥоһуллубут эт аһы оччо сыанаҕа батарабыт, — диэн санаатын үллэстэр Никан Николаевич.
«Үп-харчы тиийбэт, анал идэлээх үлэһит суох, эт, отон сыаната ыарахан” диэн санааны түһэрэ олорбокко, эдэр салайааччы барыны бары кэмигэр быһааран, ылары ылан, биэрэри биэрэн, тустаах салайааччыга орох тэбэн, кэпсэтиини ыытан сатабыллаахтык үлэлии-хамсыы олорор.
Кылаабынайа, кини үлэтин түмүгүттэн биир дойдулаахтара абыранар буоллахтара. Ама, хайдах бачча ас маанытын көрө олорон, өлөөннөр сааҥсыйаҕа кыһамматтар эбит диэҥ суоҕай?
Санаан көрүҥ, бу дьоҕус тэрилтэ халбаһы үс көрүҥүн оҥорон таһаарар. Ол ханнык көрүҥнэри оҥорорун уонна бу тэрилтэ үлэтин хамнаһын туһунан сиһилии «Саха сирэ» хаһыат сарысыҥҥы чэппиэрдээҕи нүөмэригэр ааҕыҥ.
Елена ПОТОЦКАЯ, «Саха сирэ» хаһыат.