«Өлүөнэтээҕи холбоһуктаах пароходство” салалтата “Биһиги бииргэбит” диэн аахсыйатын уһатта
Бүгүн «Өлүөнэтээҕи холбоһуктаах пароходство” ПАУо салалтата Донецкай уонна Луганскай Норуодунай өрөспүүбүлүкэлэр олохтоохторугар гуманитарнай көмөнү оҥорор “Биһиги бииргэбит” (#МЫВМЕСТЕ) диэн аахсыйатын уһатта.
«Өлүөнэтээҕи холбоһуктаах пароходство” ПАУо казначействотын салайааччы Иван Габышев: «Биһиги гуманитарнай көмөнү таһынан, Луганскайтан, Донецкайтан Саха сиригэр кэлбит дьонтон баҕалаахтары анал куурустарга үөрэтэн баран, өрүс флотугар үлэҕэ ылыахпыт. Билиҥҥи туругунан тэрилтэбит дьиэтигэр Донбасстан кэлбит дьоҥҥо анаан гуманитарнай көмөнү хомуйабыт. «Өлүөнэтээҕи холбоһуктаах пароходство” ПАУо үлэһиттэрэ бары биир санаанан салайтаран, оҕо аһылыгыттан саҕалаан таҥас-сап, иһит, гигиенаҕа туһаныллар сириэстибэлэри, бытовой тиэхиньикэлэри, бородууктаны аҕала тураллар. Ону тэҥэ, харчынан эмиэ көмөлөстүлэр. Үлэһиттэр көхтөөхтөрүн иһин салалта аахсыйаны кулун тутар 15 күнүгэр диэри уһатта. Түгэнинэн туһанан, бииргэ үлэлии сылдьар кэллиэгэлэрбитигэр ис сүрэхпититтэн махтанабыт. Биһиги бачыыммытын атын улахан тэрилтэлэр салгыахтара диэн эрэнэбит», — диэн эттэ.
Александр Тарасов, «Саха сирэ»