«Өлүөнэтээҕи холбоһуктаах пароходство» ПАУо кэлэктиибэ быыбарга көхтөөхтүк кыттар
Арассыыйа инники сайдыытын түөрэҕин түстүүр быыбар саҕаланна. Саха сиригэр эрдэһит дьон хайыы-үйэ ытык иэстэрин толорон куоластаатылар. Биирдиилээн улахан тэрилтэлэр да кэлэктииптэрэ туора турбаттар. Ол курдук, Үлэ Кыһыл знамя уордьанынан наҕараадаламмыт «Өлүөнэтээҕи холбоһуктаах пароходство» ПАУо кэлэктиибэ ханнык баҕарар таһымнаах быыбарга өрүү көхтөөхтүк кыттар үтүө үгэстээх.
Дьокуускайга тэрилтэ дьиэтигэр 721 №-дээх быыбардыыр учаастак бүгүн аҕыс чааска аанын тэлэччи аспыта. Бу учаастакка бастакынан кэриэтэ норуот дьокутаата, «Өлүөнэтээҕи холбоһуктаах пароходство» ПАУо генеральнай дириэктэрэ Сергей Ларионов ытык иэһин толорон куоластаата.
«РФ Судаарыстыбаннай Дууматыгар дьокутааттары талыы быыбара үрдүк таһымнаахтык уонна, саамай сүрүнэ, бары санитарнай нуормалар тутуһуллан саҕаланна. Быйылгы быыбарга Саха сирин олохтоохторо көхтөөхтүк кыттыахтара диэн эрэнэбин. Хас биирдии киһи быыбардыыр ытык иэһин толоруохтаах. Мин биир бэйэм инники олохпут этэҥҥэ салалларын туһугар куоластаатым», — диэн Сергей Ларионов эттэ. Санатар буоллахха, бу учаастакка бүгүн СӨ ис дьыалаҕа миниистирэ Владимир Прокопенко эмиэ куоластаата.
«Өлүөнэтээҕи холбоһуктаах пароходство» ПАУо иллээх, үлэни өрө тутар кэлэктиибэ сарсыардаттан үлэ чааһа саҕаланыан иннинэ кэлэн ытык иэстэрин толорон куоластаатылар. Ол курдук, тэрилтэ толорооччу дириэктэрэ Сергей Емельянов «Биһиги кэлэктииппитигэр куоластыы барабыт-барбаппыт диэн тыллар хаһан да иһиллибэтэхтэрэ. Ол курдук, ханнык баҕарар таһымнаах быыбардарга өрүү көхтөөхтүк кыттабыт», — диэн санаатын үллэһиннэ.