Өлүөнэ муостата 3,1 биэрэстэ усталаах, 15 биэрэстэ кэриҥэ уһун трассалаах ирбэт тоҥҥо турар Арассыыйа үрдүнэн эмиэ биир сэдэх бырайыак буолуохтаах. Бырайыак иккис түһүмэҕин судаарыстыбаннай экспертизатын аастаҕына кэлэр сылтан тутуута саҕаланыахтаах. “Муоста бырайыага Арассыыйа бырабыыталыстыбатын бэбиэскэтигэр баар”, – диэн иһитиннэрдэ РФ бэрэсидьиэнин пресс-сэкирэтээрэ Дмитрий Песков ахсынньы 23 күнүгэр Владимир Путин пресс-конференциятын кэнниттэн.
Бырайыак бастакы түһүмэҕэ судаарыстыбаннай экспертизаны ааспыта. СӨ бырабыыталыстыбата билигин аны иккис түһүмэҕин экспертизатын ааһарын кэтэһэр. Ил Дархан Айсен Николаев эрдэ иһитиннэрбитинэн, Өлүөнэ муостатын үбүлээһинэ 50 % федеральнай бүддьүөттэн көрүллүөхтээх, онтон 50 % эрэгийиэн уонна тутууга кыттыһар инвестордар аҥардаһыахтаахтар.
Дмитрий Песков бэйэтин этиитигэр бырайыак федеральнай бүддьүөттэн 100 % төлөнүөҕүн туһунан иһитиннэрии суоҕун бэлиэтээтэ. Кини этэринэн, бу бырайыак РФ бырабыыталыстыбатын бэбиэскэтигэр баар, билигин үбүлээһинин боппуруоһа кэпсэтиигэ сылдьар.
Санатан эттэххэ, бырайыак Уһук Илин эрэгийиэннэрин сайыннарыы национальнай бырагырааматыгар киирэн турар. Бырагыраамаҕа киирбит бырайыактар 2035 сылга диэри үс түһүмэҕинэн олоххо киириэхтээхтэр.
Аграфена КУЗЬМИНА