Өлүөнэ суруктаах хайаларын чөлүгэр түһэриигэ альпинистар көмөлөһүөхтэрэ

Өлүөнэ суруктаах хайаларын харыстааһыҥҥа анаммыт мунньах буолла. Кэпсэтиини «Биир ньыгыл Арассыыйа» баартыйа «Историческая память» федеральнай бырайыагын Саха сиринээҕи уопсастыбаннай сэбиэтин бэрэссэдээтэлэ Саргылаана Неустроева иилээн-саҕалаан ыытта.

Роман ПОПОВ, «Саха сирэ» хаһыат, edersaas.ru

Тэрээһиҥҥэ  Арассыыйа Наукаларын академиятын Сибиирдээҕи отделениетын Гуманитарнай чинчийиигэ, Хотугу сир аҕыйах ахсааннаах норуоттарын кыһалҕаларыгар институтун дириэктэрэ Анатолий Алексеев, Географическай уопсастыба Саха сиринээҕи салаатын сэкирэтээрэ, П.И. Мельников аатынан Ирбэт тоҥу үөрэтэр институт научнай үлэһитэ, М.К. Аммосов аатынан ХИФУ географияҕа кафедратын старшай преподавателэ Розалия Иванова,  М.К. Аммосов аатынан ХИФУ археология, этнография түмэлин дириэктэрин солбуйааччы Александр Степанов, култуура нэһилиэстибэтин эбийиэктэрин харыстааһыҥҥа департамент  салайааччытын солбуйааччы Николай Черосов, альпинизмҥа өрөспүүбүлүкэтээҕи федерация бэрэссэдээтэлэ Алексей Семенов, бэрэссэдээтэли солбуйааччы  Александр Спиридонов, М.К. Аммосов аатынан ХИФУ Сурук-бичик түмэлин үлэһитэ Евгений Горохов, кыраайы үөрэтээччи Олег Соловьев уо.д.а. кыттыыны ыллылар, санааларын үллэһиннилэр.

Кэпсэтии кыттыылаахтара суруктаах хайалары чөлүгэр түһэриигэ, харыстааһыҥҥа тустаах министиэристибэлэри, үөрэх кыһаларын, уопсастыбаннай тэрилтэлэри түмэ тардан, киэҥ өрүттээх үлэни торумнаан саҕалыырга, онно альпинизм федерациятын кытыннарарга эттилэр.

Роман ПОПОВ, «Саха сирэ» хаһыат, edersaas.ru