“Өлүөнэ муостатын тутуу РФ бырабыыталыстыбатын бэбиэскэтиттэн түспэт, бырайыакпыт судаарыстыбаннай экспертизаны ааһарын кэтэһэбит”, – диэн иһитиннэрдэ Ил Дархан Айсен Николаев быһа эпиир кэмигэр.
Кини этэринэн, муус устарга муоста бырайыагын федеральнай судаарыстыбаннай экспертизатын ыытыахтара. “Төһө да билигин араас хааччах киирэ турдар Өлүөнэ өрүһү туоруур муостабыт бырайыага бэбиэскэттэн түспэт. Бырайыакка уларыйыы суох. Үбүлээһин өттүгэр эттэххэ, Сбербаан салайааччыта Герман Греф эппитинэн, бырайыагы өйүүргэ бэлэмнэр. Ол эрээри манна этиэм этэ, бырайыак үбүлээһинэ үрдүүр чинчилээх. Онон билигин муус устарга судаарыстыбаннай экспертизаҕа докумуоннары барытын бэлэмнээн түмүгүн кэтэһиэхпит. Ол кэннэ РФ бырабыыталыстыбатын кытары кэпсэтии барыаҕа”, – диэн иһитиннэрдэ Айсен Сергеевич.
Аграфена КУЗЬМИНА