Соторутааҕыта СӨ Доруобуйа харыстабылын министиэристибэтэ, наркология өрөспүүбүлүкэтээҕи диспансера уонна «Ленатурфлот» «Речная здравница» диэн круиз тэрийдилэр.
edersaas.ru
Маннык үтүө көҕүлээһин баар буолан, Саха сирин олохтоохторо «Михаил Светлов» теплоходунан уста сылдьан, Саха сирин кэрэ-бэлиэ миэстэлэрин илэ харахтарынан көрөр уонна Дьокуускай куорат үрдүк квалификациялаах быраастарыгар доруобуйаларын көрдөрөр кыахтаннылар. Кинилэр ортолоругар Аҕа дойду Улуу сэриитин уонна тыыл бэтэрээннэрэ, Чурапчы көһөрүллүүтүн кыттыылаахтара, үлэ бэтэрээннэрэ уонна биэнсийэлээхтэр бааллар.
Өлүөнэ очуостарыгар тиийэ устубут дьону эндокринолог, травматолог, дерматолог, терапевт, нарколог, психотерапевт, невролог, офтальмолог быраастар, оптометрист, клиническэй психологтар, трудотерапевт көрдүлэр-иһиттилэр.
Круиһы тэрийээччи, наркология диспансерын кылаабынай бырааһа Альбина Сивцева эппитинэн, доруобуйаны чэбдигирдэр круизтар куруук ситиһиилээх буолаллар. «Дьиэ кэргэҥҥэ элбэх бириэмэни уурар кыахпыт суоҕа уонна айылҕаны кытары алтыһыыбыт аҕыйаҕа баар суол. Онон кылгас да, уһун кэмнээх да стресс киһи уопсай туругар уонна доруобуйатыгар дьайарын үчүгэйдик өйдүүбүт. Биһиги олохпутугар стресс суох буоларыгар кыһаллыахтаахпыт», – диэн Альбина Владимировна круиз сыалын-соругун билиһиннэрдэ.
Круиз кэмигэр наркология диспансерын клиническэй психологтара сүбэ-ама биэрдилэр, «Транскранио», «Трансаир» аппарааттар өҥөлөрүнэн үгүстэр туһаннылар. Бу аппарааттар стреһи устууга, сылайыыны суох оҥорууга уонна утуйбат буолууга көмөлөһөллөр. Ону тэҥэ, ЭКГ аппарааттарга уһулуннулар, саахардарын уонна холестериннарын бэрэбиэркэлэттилэр.
Сарсыарда аайы «Доруобуйа оскуолатын» салайааччы Мария Антонованы кытары палубаҕа тахсан сэрээккэлээһини уонна сүһүөхтэргэ гимнастика оҥорууну сөбүлээтилэр. Сорохтор Татьяна Белых куукуланан терапияҕа, мозаикаҕа уонна быысыпкаҕа ыыппыт маастар-кылааһыгар дьарыктанан сүргэлэрэ көтөҕүлүннэ.
«Михаил Светловынан» икки күн устуу кэмигэр сүүстэн тахса киһи доруобуйатын көрдөрүннэ.
Надежда ЕГОРОВА, «Саха сирэ» хаһыат, edersaas.ru