Ленскэй, Өлүөхүмэ, Амма, Таатта, Алдан улуустарыгар ЫБММ эрэгийиэннээҕи управлениетын түөрт суһал бөлөҕө үлэлиир. Билиҥҥи туругунан өрөспүүбүлүкэҕэ гидрологическай быһыы-майгы этэҥҥэ.
ЫБММ Саха сиринээҕи управлениетын пресс-сулууспата иһитиннэрбитинэн, Өлүөнэ мууһа Ленскэй улууһун сиринэн устар. Көмүөл аллараа кырыыта Ярославскайтан 5 км сиргэ, оттон үөһээ кырыыта Пеледуйтан аллараа 30 км эргин сиргэ баар. Уу таһыма 499 см. Муус суукка устата 19 км барбыт.
Гидрометеосулууспа Саха сиринээҕи управлениетын билгэлээһининэн, Ленскэй — Ньүүйэ учаастагынан муус ыам ыйын 11-13 күннэригэр устара сабаҕаланар.
Ньүүйэ өрүс мууһун алын кырыыта Куомака гидропоһуттан 100 км сиргэ баар. Уу таһыма 335 см, муус сэдэхтик устар.
Өлүөхүмэ өрүс уутун таһыма халбаҥныы турар, Дьиикимдэ — Куду Күөл хайысхатынан муус ыам 10-11 күннэригэр хамсыыра сабаҕаланар.
Өлүөхүмэ оройуонугар Тээнэ өрүс мууһа хамсаан, уу таһыма 322 см тиийдэ. Манна уу таһыма салгыы үрдүүр чинчилээх. Ол гынан баран кутталлаах таһымҥа тиийиэ суоҕун билгэлииллэр.
Алдан өрүс былаһын тухары уу таһыма үрдүүр, суукка устата 5 — 30 см үрдээтэ. Томмот гидропоһун таһынан өрүс ыам ыйын 11-12 күннэригэр устара күүтүллэр.
Амма өрүс уутун таһыма суукка иһигэр 5 – 15 см улаатта. Чугастааҕы биир-икки сууккаҕа Бууйаҕа — Амма учаастагар муус хамсыыра сабаҕаланар.
Сунтаар, Ньурба улуустарыгар Бүлүү өрүс уутун таһыма халбаҥныы турар. Сунтаар – Бүлүү хайысхатынан өрүс мууһа ыам ыйын 11-16 күннэригэр устара күүтүллэр.
edersaas.ru