Өлүөнэ өрүс сорох учаастактарыгар суудуналар эрдэ устуохтара. Ол курдук, Уус Кут – Киренскэй хайысхаҕа навигация биэс суукканан эрдэлээн аһылынна. Бүгүн “Ленскэй бассейнын дьаһалтата” ФБУ суудуналара Киренскэй – Витим төрдүнээҕи учаастакка үлэлииллэр. Муус баарын-суоҕун бэрэбиэркэлииллэр, кытылга анал бэлиэлэри туруортууллар диэн СӨ Тырааныспарга министиэристибэтэ иһитиннэрэр.
Росморречфлот дьаһалынан суудуналар Өлүөнэ өрүскэ Киренскэй – Витим өрүс төрдүнээҕи учаастакка ыам ыйын 16 күнүттэн, Витим төрдүнээҕи — Алдан өрүс төрдүнээҕи учаастакка ыам ыйын 22 күнүттэн уонна Өлүөхүмэ төрдүнээҕи — Алдан өрүс төрдүнээҕи учаастакка ыам ыйын 25 күнүттэн үлэлииллэрэ былааннаныллыбыт. Ону тэҥэ, Алдан өрүскэ ыам ыйын 23 уонна Бүлүү өрүскэ ыам ыйын 26 күннэриттэн навигация аһыллыаҕа. Биллэн турар, бу чуолкай кыраапык буолбатах, өрүстэр муустарыттан хайдах-туох ыраастаналларыттан улахан тутулуктаах.
«Бүгүн Өлүөнэ уонна Алдан өрүстэргэ дьону уҥуор кытылларга тиэйии-аҕалыы штатнай эрэсииминэн барар. Ол эрээри, быйыл өрүстэр муустара эрдэ хамсаабыттарынан сибээстээн, СӨ Тырааныспарын министиэристибэтэ тиэйии үлэтин эрдэттэн былаанныырга уонна балаһыанньа уустугурар кэмигэр сырыыны тохтотон ыларга сүбэлээтэ», — диэн Уу уонна тимир суол тырааныспарын департаменын салайааччы Семен Коркин иһитиннэрэр.
Билиҥҥи туругунан Аллараа Бэстээх – Дьокуускай, Хаҥалас (Кангалассы) – Суотту уонна Хаандыга –Кэскил хайысхаларга сымнаҕас олбохтоох 50 суудуна үлэлиир.
edersaas.ru