Кэлиҥҥи кэмҥэ аҕам саастаах дьон сынньалаҥар болҕомто ууруллар буолбута хайҕаллаах. Ааспыт сайын Татьяна Афанасьевна Сергучева бырайыагынан Сахабыт сирин кэрэ өрүһүнэн — Кыыс Амманан 5 хонуктаах катамаранынан устууга сылдьан астынан-дуоһуйан кэлбитим. Ол онно Амма кытылыгар саҥа санаа күөрэс гына түспүтэ – ол кыһыҥҥы кэмҥэ Өлүөнэ очуостарыгар айан. Дьэ, ол санааны олоххо иллэрбит биһиги хамаандабыт аҕыс саамай күүстээх санаалаах дьонун туһунан кылгастык суруйуохпун баҕардым.
Розалия Федорова (Уус Алдан, Чараҥ):
— Биир тылынан өйдөһөр дьоммун кытта Өлүөнэ очуостарыгар үөрүүнэн барсыбытым. Тохсунньу ый томороон тымныытын билбэккэ үөрэ-көтө үөһээ дабайдыбыт. Биһигини бүөбэйдээн илдьэ сылдьыбыт уолаттарга Славаҕа, Андрейга махтанабын!
Елена Каменева (Бүлүү):
— Бу Уус Алдантан сылдьар доҕотторбут идеялара. Бэрт түргэнник хомунан айаҥҥа туруннубут. Тааска былыргы үйэтээҕи суруктар, уруһуйдар, 2 килэмиэтир үрдүгү дабайан Очуостар үрдүлэриттэн арыллар кэрэ көстүүнү көрөн өрөгөйдөөһүн. “Буранынан” көтүтүү, Өлүөнэ өрүс чэбдик салгына!
Акулина Мартынова (Мэҥэ Хаҥалас, Хаптаҕай):
— Мин бу айаҥҥа бэйэбин тургутан көрөр сыаллаах туруннум. Маннык айаҥҥа киһи уйана-хатана биллэр. Баҕа санаа туолуута, саҥа эрэллээх доҕоттор – бу киһини кынаттыыр!
Люция Захарова (Чурапчы):
— Мин Өлүөнэ очуостарыгар барыыны көҕүлээбит Прасковья Бурнашеваҕа махталым улахан. Эрэллээх, күүстээх санаалаах доҕоттордоох буолан 2000 миэтэрэлээх үрдүгү ыллаҕым дии.
Татьяна Дьяконова (Кэбээйи, Мукучу):
— Сахам сирин кыһыҥҥы кэрэ көстүүтүн көрөн, дууһалыын чэпчээтим, үөрдүм-көттүм. Бу айан саҕалааһын буолар. Онон өссө саҕахтар арыллыахтара диэн эрэнэбин.
Ити курдук, мин Амматааҕы айаным аргыстара хорсуннук сананан, кыһыҥҥы туристааһын диэн тугун биллилэр.
Елена Прокопьева, уопсастыбаннай кэрэспэдьиэн.