«Өлүөнэ очуостарыгар» Национальнай култуура бастакы бэстибээлин тэрийдилэр
Өрөбүл күн «Өлүөнэ очуостара» айылҕа пааркатыгар Култуура үлэһиттэригэр анаммыт дэкээдэ чэрчитинэн Национальнай култуура 1-кы бэстибээлэ буолан ааста.
Тэрээһиҥҥэ ойуулуур-дьүһүннүүр ускуустуба, уус-уран айымньы, национальнай таҥастары тигэр норуот маастардара кыттыыны ыллылар.
Уус-уран оҥоһук уонна прикладной искусство «Симэх» Национальнай киинин үлэһиттэрэ саха, эбээн уонна эбэҥки национальнай көстүүмнэрин кэтэн, анаан оҥоһуллубут подиум устун хаамтылар. Бэстибээлгэ «Уран ИИС» айар түмсүү кытынна. Өр кэмҥэ бу бөлөх научнай салайааччытынан М.К. Аммосов аатынан ХИФУ РФ Илин уонна Хотугу норуоттарын тылларын уонна култуураларын Институтун фольклорга кафедратын доцена Светлана Петрова үлэлиир. Маны таһынан бэйэтэ тикпит үлэлэринэн Хаҥалас улууһун Чкалов нэһилиэгин олохтооҕо , норуот айымньытын өрөспүүбүлүкэтээҕи уонна бүтүн сойуустааҕы таһымнаах быыстапкалар кыттыылааҕа, дойду уонна норуоттар икки ардыларынааҕы куонкурустар лауреаттара уонна дипломаннара Инна Архипова кыттыыны ылла.
Улуус биир уустаах (родовой) общиналарын бэрэстэбиитэллэрэ Хотугу аҕыйах ахсааннаах норуоттар култуураларын кэпсээтилэр уонна ойуулаан көрдөрдүлэр.
Хас биирдии национальнай таҥас хайдах тигиллибитин, туох ис хоһоонноох ойуулааҕын, мындыр киэргэтиитин кэпсээтилэр.
Бары көстүүмнэр араас норуоттар култуураларын, үгэстэрин тутуһан, кыһыҥҥы тыйыс тымныылаах сиргэ ананан тигиллибиттэр. Айар куттаах дьон Култуура 1-кы бэстибээлин оһуохайынан түмүктээтилэр.
Тэрээһин салайааччыта, «Өлүөнэ очуостара» айылҕа пааркатын дириэктэрэ Аркадий Семенов:
— Мантан инньэ прикладной искусство маастардарын бэстибээлэ сыл аайы ыытыллар буолуоҕа. Саха сирин биир саамай кэрэ миэстэтигэр быйыл аан бастаан ыытыллыбыт тэрээһин кыттааччылара бэйэлэрин чаҕылхай талааннарынан бэстибээлбитин олус киэргэттилэр.
Хотугу норуоттар национальнай көстүүмнэрэ «Өлүөнэ очуостара» айылҕа пааркатын кыһыҥҥы кэрэ көстүүтүн кытта олус да дьүөрэлии эбиттэр.
Онон бу бэстибээл Хотугу норуоттар култууралара сайдыытыгар кэскиллээх тосхоллору торумнуурга көҕүлээтэ. Эһиилгиттэн тэрээһин географиятын кэҥэтэн, өрөспүүбүлүкэ улуустарын хабан, киэҥ далааһыннаахтык ыытар буолуохпут. Сахабыт сиригэр олорор хотугу норуоттар үгэстэрин, дириҥ философскай ис хоһоонноох култуураларын омук туристарыгар көрдөрөрү-билиһиннэрэри ситиһиэхпит, — диэн бэлиэтээтэ.
Аркадий Анатольевич «Өлүөнэ очуостара» айылҕа пааркатын салалтата кэккэ суолталаах тэрээһиннэри былаанныырын билиһиннэрдэ:
— Былырыыҥҥыттан ыла «Өлүөнэ очуостара» туристары кыһыҥҥы кэмҥэ эмиэ сырытаннаран күүлэйдэтэр буолбута. 2018 сылга туристическай сезону эрдэлээн олунньу 25 күнүгэр астыбыт. Айылҕа пааркатын сөбүлээн, турист тоҕуоруһа мустарыттан биһиги олус үөрэбит. Холобур, бүгүн, биир өрөбүл күҥҥэ, айылҕа пааркатыгар 1438 киһи сырытта. Онтон биһиги, салайааччылар, сонун уонна интэриэһинэй сүүрээннэри олоххо киллэрээри бэлэмнэнэ сылдьабыт. Онон өрөбүл аайы айылҕа пааркатыгар сынньана кэлбит дьон араас сонун сүүрээннэр олоххо киириилэрин туоһуларынан буолуохтара, — диэн санаатын тиэртэ «Өлүөнэ очуостара» Айылҕа пааркатын дириэктэрэ Аркадий Семенов.
… Дьэ, онон хас өрөбүл аайы «Өлүөнэ очуостара» Айылҕа паарката эһигини долгуйа кэтэһэр, доҕоттор!
Елена ПОТОЦКАЯ, «Саха сирэ» edersaas.ru
Хаартыскалар: СӨ айылҕа харыстабылын министиэристибэтин пресс-сулууспатын түһэриилэрэ.