2021 сылга Саха Өрөспүүбүлүкэтигэр “Өлүөнэ очуостара” Национальнай паарка кыраныыссатын олохтооһун түмүктэнэр.
edersaas.ru
«Рослесинфорг» ФГБУ Саха сиринээҕи салаатын исписэлиистэрэ Саха сиригэр “Өлүөнэ очуостара” национальнай паарка кыраныыссатын олохтуур үлэни салгыы ыыттылар. Рослесинфорг Саха сиринээҕи салаатын инженердэрэ хонуу үлэлэригэр 2021 сыл саҥатыгар сылдьыахтара, ол чэрчитинэн айылҕа ураты харыстанар сирин кыраныыссаларын оҥоруохтара.
Исписэлиистэр сайын саҕаланыытыгар хонуу үлэтин түһүмэҕэр ылсар туһугар, 1,2 тыһыынча га иэннээх сиргэ бэлэмнэнии камеральнай үлэлэрин түмүктээтилэр. Үлэ хаамыытын кэмигэр картография сибидиэнньэлэрин үөрэттилэр, сири ыраахтан кэтээн көрүү чахчыларын оҥордулар. Түмүккэ Национальнай паарка кыраныыссаларын эргийэр туочукалара быһаарылыннылар.
Үлэ түмүгүнэн, «Өлүөнэ очуостара» Национальнай паарка кыраныыссатын туһунан сибидиэнньэлэр Хамсаабат баай биир кэлим судаарыстыбаннай реестригэр киллэриллиэхтэрэ. Ол айылҕа комплекстарын уонна эбийиэктэрин ураты харыстааһын эрэсиимин хааччыйыаҕа.
Өлүөнэ очуостара – айылҕа дьиктитэ уонна Саха сирин айылҕатын паарката. Өлүөнэ очуостара диэн ааттаах хайа систиэмэтэ Өлүөнэ өрүс кытылын кыйа уонунан килэмиэтиринэн тардыллар. Систиэмэ диэн – Национальнай паарка сиригэр-уотугар үөһээ өрө тардыспыт таас хайалар. Паарка Алдан, Хаҥалас уонна Өлүөхүмэ оройуоннарыгар баар.
Өлүөнэ очуостара 2006 сылтан ЮНЕСКО харыстабылыгар ылыллыбыттара уонна киһи тыыппатах эко-систиэмэтин илдьэ хаалбыт планета биир сөҕүмэр миэстэтинэн билиниллибиттэрэ.
«Саха сирэ», edersaas.ru анаан Наталья КОЛОДЕЗНИКОВА