«Өлүөнэ очуостара» айылҕа пааркатын салалтата туризмы сайыннарыыга ыытар үлэтин бэрт көдьүүстээхтик тэрийэн, иһитиннэрэн-биллэрэн, билигин Саха сирин биир саамай киэн туттуута буола сылдьар.
edersaas.ru
Ол курдук, Ил Түмэн дьокутаата, айылҕа пааркатын дириэктэрэ Аркадий Семенов былырыын Хаҥалас улууһугар Покровскайга ыытыллыбыт «Туризм — территория сайдыыта» бизнес-форумҥа: «Өскөтүн сылга алта айылҕа пааркатыгар: «Уус-Ленскэй», Өлүөхүмэ заповедниктарга, «Муома», «Өлүөнэ очуостара», «Сиинэ» уонна «Уус-Бүлүү» Айылҕа пааркаларыгар холбоон 23400 киһи сылдьыбыт буоллаҕына, 20953 турист аҥардас «Өлүөнэ очуостарыгар» сырытта», — диэн бэлиэтээбитэ. ЮНЕСКО аан дойдутааҕы нэһилиэстибэтигэр киирбит айылҕа паарката 2024 сылга диэри туристар ахсааннарын 70 000 тиэрдэр соруктаах.
Былырыын, ахсынньы ортотугар, Москва куоракка ыытыллыбыт «Уһук Илин күннэригэр» Ростуризм салатата кыттыылаах тэрээһиҥҥэ Аркадий Семенов «Өлүөнэ очуостарын» туһунан билиһиннэриитэ бэрт улахан болҕомтону тардыбыта.
Кэлиҥҥи кэмҥэ «Өлүөнэ очуостара» айылҕа паарката кыһыҥҥы туризмы сайыннарыыга улахан үлэни ыытар. Ол курдук, сыл аайы олунньуга «Лабыдьа-Батамай » маршрутунан айан суолун ыраастыыллар, суол бэлиэлэрин, иһитиннэриилэри туруораллар, хайаҕа ыттар кирилиэһи ыраастыыллар, муус куораты киэргэтэллэр.
Бу суботунньукка айылҕа пааркатын иниспиэктэрдэрин, үлэһиттэрин кытта улуустааҕы дьаһалта туризмы сайыннарыыга үлэлэһэр исписэлиистэрэ муус, мас бэлэмнээһинигэр сылдьаллар.
Айылҕа пааркатын салалтата иһитиннэрбитинэн, быйыл «Булгунньахтаах—Уус Буотама» бизонарийга тиийэр саҥа турмаршрут аһыллыаҕа. Бу күннэргэ айан суола оҥоһулла сылдьар.
— Бизонарий тутар сир туристар болҕомтолорун улаханнык тардыаҕа диэн эрэнэбит. СӨ бырабыыталыстыбата уонна СӨ Айылҕа министиэристибэтэ бизонарийы РФ кыыллар тутуллар эбийиэктэрин реестиригэр уонна РФ Кыһыл Кинигэтигэр киллэрэр туһунан кэпсэтии ыыта сылдьаллар.
Бу күннэргэ кыһыҥҥы туризм сезонун аһарга «Өлүөнэ очуостара» айылҕа паарката олох эрдэттэн бэлэмнэнэ сылдьар. Аны муус паарканы оҥорон, туристарга аналллаах «Шашлык бэстибээлэ», саха маастардарын оҥоһуктарын көрүү, балыгы кыһыы, муус аннынан балыктааһын, о.д.а куонкурстары ыытыахпыт. Сыл аайы биирдиилээн предпринимателлэри кытта анаан кэпсэтэбит, сааскы кэмҥэ туристары кытта үлэлэһэргэ ыҥырабыт«, — диэн санаатын үллэстэр Ил Түмэн дьокутаата, «Өлүөнэ очуостара» айылҕа пааркатын дириэктэрэ Аркадий Семенов.
Олунньу 12 күнүгэр Дьыл Оҕуһун бастакы муоһа түһэр. Онтон ыла сааскы ылааҥы күннэр саҕаланыахтара. Ону кытта, киһи айылҕаҕа тиийэн сынньанар баҕата күүһүрэр кэмнэрэ саҕаланыахтара турдаҕа. Дьэ, онон эрдэттэн бэлэмнэнэн, күндү доҕоттор, «Өлүөнэ очуостара» айылҕа пааркатыгар сынньана барарга эрдэттэн былааннаныҥ.
Елена ПОТОЦКАЯ,»Саха сирэ» хаһыат, edersaas
Хаартыска: «Өлүөнэ очуостара» айылҕа пааркатын саайтыттан